Di 17’ê nîsanê de zêdetirî 193 milyon hilbijêr li Endonezyayê çûn ser sindoqan û dengê xwe dan. Hat zanîn ku ji 17’ê nîsanê ve 272 peywirdarên sindoqan ji ber nexweşiyên girêdayî westanê, jiyana xwe ji dest dan
Di nava dewletên cîhanê de welatê herî zêde hilbijêrên wê hene, Endonezya ye. Di 17’ê nîsanê de li Endonezyayê hilbijartin pêk hat û zêdetirî 193 milyon hilbijêr çûn ser sindoqan. Ji roja 17’ê nîsanê ve, bi şev û roj deng tên hilbijartin û hîn jî didome. Li gorî agahiyan, ji 17’ê nîsanê ve zêdetirî 272 peywirdarên sindoqan bi sedema nexweşiyan girêdayî westanê çêdibin, jiyana xwe ji dest dane.
Têkildarî mijarê Berdevkê Komîsyona Hilbijartinên Giştî Arîef Priyo Susanto ji BBC’yê re axivî û wiha got: “Jimartina dengan a bi dest, pir dirêj di ajot. Ji ber ku jimartin demekî dirêj dom kir, 1878 kes nexweş bûn û rakirin nexweşxaneyê. Em ê tazmînatê bidin peywirdarên sindoqan ên ku di dema jimartina dengan de jiyana xwe ji dest dane.”
7 milyon peywirdar
Li gorî agahiyan, zêdetirî 7 milyon kes di hilbijartinên Endonezyayê de hatibûn peywirdarkirin. Tê gotin ku peywirdarên sindoqan heta derengiya şevê di şert û mercên zehmet de dixebitin. Li Endonezyayê zêdetirî 193 milyon hilbijêr hene û ji van hilbijêran, ji sedî 80’an li 800 hezar navendên hilbijartinê dengê xwe dan.
Du hilbijartin pêkve hatin kirin
Serokomariya Endonezyayê bi hinceta tasarûfê, di 17’ê nîsanê de hem hilbijartina parlamentoya navendî û hem jî ya herêmî bi hev re kirin. Tê gotin ku vê rewşê jî bandorekê neyînî li ser jimartina dengan kiriye. Tê payîn ku encama hilbijartinê dê di 22’yê gulanê de aşkera bibe.
