Polîsan li Enqereyê bi ser gelek malan de girt. Di encama serdegirtina malan de Merve Demîrel ku demek berê ji hêla polîsan ve hatibû tacîzkirin û 2 kesên din hatin binçavkirin
Welatiya bi navê Merve Demîrel ku demek berê di dema binçavkirinê de li Kolana Yuksel a Enqereyê ji hêla polîsan ve hatibû tacîzkirin, hate binçavkirin. Hat zanîn ku tevî Demîrel, kesên bi navên Mehmet Yilmaz (70) û Bengîsu Demîrel jî hatin binçavkirin.
Piştre jî polîsan bi ser mala Acun Karadag ê ku Bi Biryarnameya Di Hukmê Qanûnê de (KHK) hatibû îxrackirin de girt. Polîsan di serdegirtinê de li malê lêgerîn kirin.
Der barê mijarê de Buroya Hiqûqê ya Gel li ser hesaba xwe ya twîtterê agahî dan û diyar kir ku şevê din polîsan bi ser gelek malan de girtiye. Buroyê da zanîn ku di serdegirtinan de muwekîla wan Merve Demîrel li nexweşxaneyê hatiye binçavkirin û di serdegirtina malê de jî Mehmet Yilmaz û Bengîsû Demîrel hatine binçavkirin. Acun Karadag jî li ser hesaba xwe ya twîtterê agahî dan û diyar kir ku polîsan bi ser mala wî de girtine. ENQERE
