Li gundewarên Eyn Îsayê di navbera şervanên HSD’ê û hêzên dagirker ên dewleta tirk û çeteyên wê de şerekê dijwar diqewime. Ji ber êrîşan rêya navneteweyî ya M4’ê qut bû
Artêşa tirk a dagirker û çeteyên wê yên El Nusra, DAIŞ û OSO’yê îro di danê sibehê de li dijî gundewarên navçeya Eyn Îsayê û rêya M4’ê ya navneteweyî bi çekên giran ên weke tank, top û bi balafirên biçek ên SÎHA’yê û bi tevlêbûna bi hezaran çeteyan êrîşeke giran da destpêkirin.
Li gorî agahiyên ji herêmê, şervanên Hêzên Sûriyeya Demokratîk (HSD) û hêzên rejîmê jî li dijî van êrîşan bersivan didin. Hat zanîn ku şer li gundên Seyda, Mualeq û Wasta yên li rojavayê Eyn Îsayê dijwar e.
Di heman demê de çavkaniyan ragihand ku hêzên dagirker gundê Şergirak ê Eyn Îsayê û derdora navçeyê jî bi dijwarî topbaran dikin. Li vê herêmê jî şerekê dijwar didome. Çavkaniyan ragihand ku ji ber êrîşên hêzên dagirker, rêya navneteweyî ya M4’ê ya di navbera Eyn Îsa û Kobanê û Eyn Îsa û Şergirakê de hate qutkirin û xetere li ser jiyana sivîlan heye.
Li herêmê şer bi hemû dijwariya xwe didome. EYN ÎSA
