Girtiyên jin ên li Girtîgeha Jinan a Tîpa M ya Bayburtê bi rêya malbatên xwe ragihandin ku ji bo rakirina tecrîda girankirî ya li ser Rêberê Gelê Kurd Abdullah Ocalan, ji 5’ê çileyê ve dest bi greva birçîbûnê ya bêdem û bêdorveger kirine
Greva birçîbûnê ya bêdem û bêdorveger ku girtiyên siyasî bi pêşengiya hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) a Colemêrgê Leyla Guven, di 7’ê mijdarê de ji bo rakirina tecrîda girankirî ya li ser Rêberê Gelê Kurd Abdullah Ocalan daye destpêkirin, bi tevlêbûna girtiyên nû didome. Di vê çarçoveyê de 3 girtiyên jin ên li Girtîgeha Jinan a Tîpa M ya Bayburtê dest bi greva birçîbûnê ya bêdem û bêdorveger kirin.
Der barê mijarê de malbatên girtiyan agahî dan û gotin ku girtiyên bi navê; Sevgî Akagunduz, Fatma Yildirim û Delîla Roj Erkmen di 5’ê çileyê de dest bi greva birçîbûnê ya bêdem û bêdorveger kirine. Malbatan da zanîn ku her wiha çalakiya greva birçîbûnê ya bêdem û dorveger ku10 rojan carekê ji hêla komeke nû ve tê dewrgirtin jî didome.
Pirtûk û name hatine qedexekirin
Her wiha malbatan bal kişand ser zextên li ser girtiyan û ev agahî dan: “Bi hincetên cuda girtî rastî cezayên hucreyê tên. Di heman demê de hevdîtinên bi parêzeran re tên astengkirin û nameyên girtiyan jî nadin wan. Girtiyan da zanîn ku pirtûk jî nayên dayîn û gotin; ‘Rêveberiya girtîgehê ji me re dibêje ku hûn tenê dikarin di rojên taybet ên weke rojbûn, sersal û cejnên olî de pirtûkan bixwazin.’”
