Li gorî agahiyan, li Girtîgeha Hejmar 5 a Tîpa L a Sîlîvriyê testa vîrûsa koronayê (Covîd-19) a 2 girtiyên siyasî pozîtîf derketiye. Di heman demê de hat ragihandin ku di 3 girtiyan de jî nîşaneyên şewbê hene.
Der barê mijarê de seroka Şaxa Komeleya Mafên Mirovan (ÎHD) a Stenbolê Gulseren Yolerî axivî û ev agahî dan: “Xizmekê girtiyê bi navê M.A. yê ku li girtîgeha Sîlîvriyê dimîne bi telefonê li me geriya û hin agahî dan me. Li gorî agahiyên malbatê, testa Covîd-19 a girtiyên bi navên Z.S. û H.P. pozîtîf derketine. Li şûna ku bixin karantînayê, veguhestine qawîşên wan.”
Bi domdarî jî Yolerî da zanîn ku piştî ku girtî S. û P. dixin qawîşan, girtiyên bi navên N.B. û H.U. ku nexweşiyên wan ên kronîk hene jî di bêhngirtin û bêhndayînê de zehmetî kişandin û wiha domand: “Her wiha germa laşê girtiyê bi navê M.F.E. jî zêde bûye û dikuxe. Fikara me ew e ku ev girtî bi şewbê ketibin. Hêj testa van 3 girtiyan nehatiye kirin. Ev agahî hêj nehatiye piştrastkirin. Em bang li rayedaran dikin ku bergiriyên lezgîn bigirin.”
Hat îdiakirin ku girtî Z.S. ku testa wî pozîtîf derketiye, yek ji çalakvanên ku ji bo rakirina tecrîda girankirî ya li ser Rêberê Gelê Kurd Abdullah Ocalan ketibû greva birçîbûnê bû. STENBOL
