Zext û binpêkirinên dewleta tirk ên li girtîgehên bakurê Kurdistanê û Tirkiyeyê yên li ser girtiyên siyasî bênavber didomin. Têkildarî mijarê girtiya bi navê Remziye Karadag ku li qawîşa C-a ya Girtîgeha Girtî ya Jinan a Xarpêtê dimîne, bi rêya telefonê agahî dan.
Karadag da zanîn ku di 12’ê gulanê de komeke gardiyanan ku ji 20 kesan pêk dihat, êrîşî wê û 3 hevalên wê yên li qawîşê kir. Karadag diyar kir ku tevî ku dema wan a bêhnstendinê bi dawî nebûbû jî, gardiyanan ew bi zorê xistin odeyê û dema ku li dijî vê binpêkirinê derketin jî hatine derbkirin.
Bi domdarî jî Karadag ev agahî dan: “Ji ber lêdanê laşê min werimî ye. Lê tevî vê jî em nebirin nexweşxaneyê û rapor nedan me. Gardiyan ji bo êrîşî girtiyan bikin hatine perwerdekirin. Dibe ku di demekî nêz de êrîş zêdetir bibin. Em bang li raya giştî û saziyên mafên mirovan dikin ku li hemberî girtîgehan bi hestiyar tevbigerin.” XARPÊT
