Hat derpêşkirin ku 12 girtiyên ku hefteya borî ji Girtîgeha Jimare 1 a Tîpa T a Tekîrdagê bi zorê hatine sewqkirin hatine derbkirin. Tê gotin bi hinceta ku dê Girtîgeha Tîpa T ji bo jin û zarokan bê amadekirin girtî hatine sewqkirin û di dema sewqkirinê de leşkeran heqaret li girtiyan kirine.
Girtî bi rêya parêzerên xwe ragihandine ku li têketina Girtîgeha Tîpa F yê lêgerîna tazî li wan hatiye ferzkirin û ji ber ku qebûl nekirine hatine derbkirin. Her wiha girtiyan diyar kiriye ku pirtûk û kincên wan jî hatine desteserkirin. Her wiha li 3 girtiyên di heman girtîgehê de jî gava bi zorê sewqî Girtîgeha Jimare 2’yan a Tîpa F hatine kirin jî lêgerîna tazî hatiye ferzkirin û hatine derbkirin.
Li Bakirkoyê avêtin ser qawişan
Hat diyarkirin ku li Girtîgeha Jinan a Bakirkoyê jî, roja înê avêtine ser qawîşa C9 û qawîşa C10’ê. Hat ragihandin ku ji sedî zêdetir gardiyan avêtine ser qawîşan û di avêtina ser qawîşan de amûrên girtiyan hatine belawelakirin û radyoyên wan jî hatine desteserkirin. Hat gotin ku di dema avêtina ser qawîşan de gava hin girtiyan bertek dane gardiyanan dest xistine qirika wan, ew 
derb kirine û gef li wan xwarine.
Li Bandirmayê 25 girtî hatine sewqkirin
Li Girtîgeha Bandirmayê ya Balikesîrê jî 25 girtî di 25’ê sibatê de bi zorê sewqî Girtîgeha Jimare 1 a Tîpa T a Afyonê hatine kirin. Hat diyarkirin ku di dema sewqkirinê de girtî hatine derbkirin û yek ji van girtiyan jî Abdûllah Ongûnlû ye ku di lîsteya girtiyên nexweş a Komeleya Mafên Mirovan (ÎHD) de ye. Birayê wî Mehmet Ongûnlû anî ziman ku birayê wî 26 sal in girtiye û gelek nexweşî lê peyda bûne.
Ongûnlû diyar kir ku gava pê hesiyane girtî hatine sewqkirin telefonî Girtîgeha Bandirmayê kirine û got ku girtîgehê jî piştrast kiriye ku girtî hatine sewqkirin.
Ongûnlû destnîşan kir ku birayê wî nexweş e û nexweşîna wî giran e, ji ber ku nexweş e xwestine neqlî girtîgeheke nêzî wan bê kirin û ji bo vê serî li Wezarata Dadê û Midûriyeta Giştî ya Girtîgehan dane, lê belê serlêdanên wan nehatine bersivandin û her wiha got ku ji bo girtiyên hatine derbkirin ew ê gilî bikin. STENBOL
