Komîsyona Girtîgehan a Komeleya Mafê Mirovan (ÎHD) a Stenbolê Rapora Binpêkirinên Mafan a 3 mehan li girtîgehên Herêma Marmarayê qewimîne aşkera kir. ÎHD’ê ji bo aşkerakirina raporê li avahiya xwe civîn li dar xist. Seroka komeleyê Gulseren Yolerî û rêveber beşdar bûn.
Yolerî raporê aşkera kir û diyar kir ku li 25 girtîgehên cuda 187 serlêdan ji bo komeleya wan hatiye kirin û 2 hezar û 314 binpêkirinên mafan qewimîne. Yolerî da zanîn ku di her serlêdanê de gelek binpêkirin hene û di meha nîsanê de 533, di meha gulanê de 645 û di meha hezîranê de jî hezar û 136 binpêkirinên mafan qewimîne.
Bi hezaran binpêkirin
Yolerî destnîşan kir ku mafên wek tenduristiyê, sohbet, werzîş, qada hevpar, kelûpel û gelek mafên din hatine desteserkirin û bi vê yekê re îşkence li girtiyan hatiye sepandin û bi giştî 2 hezar û 314 binpêkirin pêk hatine.
Her wiha Yolerî anî ziman ku di pêvajoya pandemiyê de binpêkirinên mafên girtiyan her ku çûne zêde bûne û xwest mafên girtiyan li wan bên vegerandin û mafên tenduristiyê neyên sînordarkirin. STENBOL
