Navenda Ragihandin û Çapemeniyê ya HPG’ê bi daxuyaniyekê ragihand ku hêzên wan ên HPG û YJA Starê li Heftanîn, Xakurkê û Şirnexê li dijî artêşa tirk çalakî li dar xistin.
HPG’ê da zanîn ku hêzên wan di çarçoveya Pêngava Cenga Heftanînê de ku li herêma Heftanînê ya Herêmên Parastinê yên Medyayê dewam dike de, di 25’ê nîsanê saet di 04:30’an de li dijî artêşa tirk a li ser girê Şehîd Şêxmûs çalakiyek kirin. HPG’ê diyar kir ku hêzên wan ji 2 baskan ve avêtin ser gir û ketin nava kozikên leşkeran. Daxuyanî wiha dom kir: “Di çalakiyê de 4 kozikên dijmin ên li ser gir bi temamî hatin îmhakirin. Di vê çalakiyê de 9 leşkerên dijmin hatin kuştin û 2 çekên MPT-55, 2 dûrbînên termal û cîhazeke ragihandinê ji ser leşkerên dijmin hatin rakirin. Her wiha 2 çekên giran ên A-4, 3 kamerayên mobese û dûrbînek teleskopê hatin îmhakirin.”
Di daxuyaniyê de HPG’ê destnîşan kir ku di çalakiyê de 3 gerîlayên wan jî jiyana xwe ji dest dane û dê piştre nasnameyên wan parve bikin. Bi domdarî jî HPG’ê daxuyand ku hêzên wan di çarçoveya Pêngava Şoreşgerî ya Şehîd Bager û Şehîd Ronya de, di 26’ê nîsanê saet di 01:30’an de li herêma Xakurkê ya Herêmên Parastinê yên Medyayê li dijî leşkerên li ser Girê Lelîkanê çalakiyek pêk anîn. HPG’ê diyar kir ku di çalakiyê de derbên giran li yekîneya artêşa tirk hatine xistin û bi qasî ku hatiye zelalkirin, leşkerek hate kuştin. HPG’ê got ku yekîneya wan a çalakî pêk anî bi serkeftî li baregehên xwe vegeriya ye.
Çalakiya li Şirnexê
Daxuyanî wiha bi dawî bû. “Di çarçoveya Pêngava Tolhildanê ya Şehîd Medya Mawa û Şehîd Rizgar Gever de hêzên me di 23’yê nîsanê de li herêma Besta ya Şirnexê li dijî leşkerên li qada Eyşedinkê çalakî pêk anîn. Di vê çalakiyê de ku derbên giran li yekîneya dijmin hate xistin, bi qasî ku hate tespîtkirin 2 leşker hatin kuştin. Yekîneya me ya çalakî pêk anî bi rengekî serkeftî li baregehên xwe vegeriya.” BEHDÎNAN
