Mala Çavdêriya Mafên Mirovan a Sûriyeyê bi daxuyaniyekê ragihand ku li bakurê Hemayê di navbera hêzên rejîmê Sûriyeyê û çeteyên El Nusrayê de şer derketiye. Çavdêriyê diyar kir ku di êrîşê de 31 jê çete û 14 jî leşkerên rejîmê, bi giştî 45 kes hatine kuştin
Li Sûriyeyê çeteyên ku Enqereyê piştgiriya wan dike li bakurê Hemayê êrîşî hêzên rejîma Sûriyeyê kir. Li ser êrîşê jî şerekî giran qewimî. Têkildarî mijarê Mala Çavdêriya Mafên Mirovan a Sûriyeyê agahî dan.
Mala Çavdêriyê ya Mafên Mirovan a Sûriyeyê da zanîn koma Heyet Tehrîr El Şamê (El Nusra) li bakurê herêma Hemayê êrîşî noqteyên rejîma Sûriyeyê kir. Çavdêriyê da zanîn ku di encama şerê li vê herêmê de 31 jê çete û 14 jî leşkerên rejîma Sûriyeyê, bi giştî 45 kes hatine kuştin.
Têkildarî mijarê ajansa dewletê ya Sûriyeyê Sanayê jî ragihand ku artêşa Sûriyeyê êrîşa komên terorîst a li dijî noqteyên leşkerî yên li Til Melh a banliyoya bakurê Hemayê têk biriye. Li gorî ajansê, hêzên rejîmê gelek wesayîtên çeteyan jî rûxandine. Hate ragihandin ku komên çekdar roketan diavêjin gelek gundên li bakurê Hemayê.
