Li hemberî hewldana destwerdana şaredariya Wanê gelê kurd bi sekna xwe ya biryardar peyam û bersiva xwe bi zelalî da desthilata AKP-MHP’ê.
Gelê kurd bi vê helwesta xwe, xwedî li vîna xwe derket û got: “Em ê rê nedin feraseta qeyûman.”
Got ku ew ê tu car serî li ber derteserkirina qeyûm û xespkirina vîna gelan serî netewînin, ew ê li hemberî plana serîtewandin û çokdanînê bêdeng nemînin.
Gelê kurd bi bersiva xwe ya sindoqan desthilata AKP’ê ber bi jêr ve gindirand û dawî li pêkanîna qeyûman anî.
Gelê Wanê bi hest û helhesta xwe ya şoreşgerî, ligel şaredariya bajarê mezin, ji 14 şaredariyên navçeyan, her 14 şaredarî jî bi rêjeyeke bilind bidest xist.
Desthilata AKP’ê dîsa planên xwe yên qirêj xistibû meriyetê û roja 29’ê adarê, di kêliya dawî de qaşo bi hinceta hiqûqî dixwest dest deyne ser mazbataya Abdullah Zeydan ê ku gelê Wanê ew wek vîn û şaredar hilbijartibû.
Gelê Wanê û hemû gelê kurd vê lîstik û bêhiqûqiyê qebûl nekir, li ber xwe da, xwedî li vîna xwe derket.
Ev berxwedan û xwedî derketina li vîna xwe, hişyarî û haydarî di nava gelê bajarên din ên Serhed, Botan û Amedê de jî çekir.
Berxwedana gelê Wanê ya xwedîderketina li vîna xwe, di heman demê de di nava partiyên siyasî yên muxalîf û saziyên sivîl de jî bû çirûska helwest, hewldan û hêzeke xurt a li hemberî zilm û zordariya AKP-MHP’ê û rihê yekitî û hevgirtina gel û civakê ava kir, anî ber hev û ji bajarên kurdistan û Tirkiyeyê bi hezaran gel herikî bajarê Wanê.
Vê herikînê, bi cih anîna heq, hiqûq û zagonên ku demên dirêj li Tirkiyeyê di refan de toz girtibû bi bîra Akp-Mhp û raya giştî ya Tirkiye û cihanê xist.
Vê berxwedana gelê Wanê, ji gelê bajarên din û alîgirên azadî, wekhevî û demokrasiyê re jî bû mînaka wêrekî, serhildan, berxwedan û xwedî derketina li vîn û rûmeta xwe, pir aşkare û bi zelalî du tiştên berbiçav dersxist holê û diyar kir.
Yek: Ew çand û kevneşopiya berxwedan û rihê xwedî derketina li vîna xwe ya ku bi gelên Kurd dabûn jibîrkirin zindî kir, bi bîra gel û civakê xist.
Du: Hêviya AKP-MHP’ê, ango Erdogan û Bexçelî a mîna du serdemên berê dîsa bi marîfeta qeyûman desteserkirina şaredariyên ku bi vîna gel hatine bidestxistin şikand û di dilê wan de hişt.
Gelê kurd, bi berxwedana parastina vîna xwe derseke dîrokî da desthilata AKP-MHP’ê û hevkar û hevalbendên wê.
Ev bû derseke wisa ku êdî nema desthilata AKP-MHP’ê wêrekiya destwerdan û desteserkirina şaredariyên gel nîşan bide.
Êdî nema gelê kurd li bajar, navçe û bajarokên ku bi dengê gel hatine bidestxistin destûr bide desteserkirina vîn û rûmeta xwe.
