Buroya herêmî ya UNICEF’ê li herêma Rojhilata Navîn û Bakurê Afrîkayê bêyî ku îşaret bi dewleta tirk bike yan jî şermezar bike, raporeke xemgîniyê der barê komkujiya li Til Rifatê de weşand
Artêşa dewleta tirk û çeteyên wê, duh li dijî şêniyên Efrînê yên ji neçarî koçberî bajarê Til Rifatê ya Kantona Şehbayê bûn, komkujiyek pêk anî û di encamê de piranî zarok 10 sivîl şehîd bûn û 12 kes jî birîndar bûn.
Di vê çarçoveyê de, Buroya Herêmî ya Rêxistina NY’yê ya Zarokan (UNICEF) a li herêma Rojhilata Navîn û Bakurê Afrîkayê ku navenda wan li paytexta Urdunê Umanê ye, raporeke fermî weşand ku der barê komkujiyê de qaşo xemgîn in.
Daxuyaniya UNICEF’ê îşaret bi dewleta tirk a dagirker ku komkujî li dijî zarokên li Til Rifatê pêk aniye, nekir û tu şermezarkirin der barê dewleta tirk û çeteyên wê de, li ser komkujiyê ranegihand.
Di daxuyaniya UNICEF’ê de wiha hat gotin: “Em xemgîniya xwe der heqê raporên ku bi dest ketine ku ji ber êrişên li ser bajarokê Til Rifat ê bakurê Helebê, 8 zarok hatine qetilkirin û hinên din jî birîndar bûne, radigihînin.”
Piranî zarok kêmî 15 saliyê ne. Bi van êrîşan re hejmara zarokên ku li bakurê Sûriyeyê di çend hefteyên borî de hatin kuştin, gihîşt 34’an. Di dirêjahiya 9 salên borî ji aloziya Sûriyeyê de, tu rêgezên bingehîn ên parastina zarokan tune bûn. QAMIŞLO
