Navenda Nûçeyan |
Koronavîrûs li Îranê roj bi roj belavtir dibe. Ji wezîran heta parlamenteran, gelek kes bi vîrûsê ket. Têkildarî mijarê Alîkarê Serokê Meclisa Îranê Abdurriza Misrî daxuyaniyek da û da zanîn ku 23 parlamenter bi coronavîrûseke nû ketine.
Li Îranê heta niha herî kêm 66 kesan ji ber coronavîrûsê jiyana xwe ji dest dan û di hezar û 501 kesan de jî coronavîrûs hatiye tespîtkirin. Lê tê payîn ku ev hejmar zêdetir e.
Rayedarê payebilind jî jiyana xwe ji dest da
Hêjayî bibîrxistinê ye ku heta niha li Îranê endamê Meclisa Îranê û di heman demên de şêwirmendê pêşengê olî yê Îranê Ayetullah Elî Xamaney ê bi navê Muhammed Mîrmuhammedî jî duh ji ber vîrûsê mir. Her wiha serokê Komîsyona Ewlehiya Neteweyî û Polîtîkaya Derve ya Meclisa Îranê Mucteba Zunnûr û 4 parlamenterên din, Alîkarê Serokomarê Îranê Masume Îbtîkar, Alîkarê Wezîrê Tenduristiyê Îreç Herîrçî û Rektorê Zanîngeha Tipê ya Komê Muhammed Riza Qadir jî bi vîrûsê ketine. Di heman demê de yek ji pêşengên olî yên Îranê û konsolosê Vatîkanê yê Îranê yê berê Huccetulîslam Hadî Husrevşahî jî ji ber coronavîrûsê mir.
