Li bakurê Îranê ji ber lehiyê rêya 270 gundan hate girtin, bajarokek û 20 gund hatin valakirin. Her wiha 9 kes mirin û ziyanek mezin li welatiyan bû
Li parêzgehên Mazendewan û Gulistan ên li bakurê Îranê ji ber baran û berfa çend rojên borî barî lehî rabû. Lehiyê gelek ziyan gihand şêniyên wan herêman.
Li parêzgehên Mazendewan rêya 200 gundan hate girtin û çend kes jî winda ne. Bajarokek û 20 gund jî hatin valakirin û li Gulistanê jî rêya 70 gundan hate girtin. Tê gotin ku bi giştî 9 kes mirine.
Rêveberê Giştî yê Rêveberiya Qeyrana Gulistanê Muceteba Cemalî duh ji ajansên Îranê re aşkera kirîbû ku niha herî zêde pirsgirêk li bajarê Aq Qale ye û got ku ji sedê 70’ê bajêr di bin avê de maye.
Qaymeqamê bajarê Gumîşan Emîrşîr Tumac diyar kir ku biryara valakirina bajarokê Sîmîn Şehir û 20 gundên dikevin kenarê rûbarê Gurkanrûd dane û hatine vale kirin. TEHRAN
