Navenda Nûçeyan |
Li seranserî Iraq û başûrê Kurdistanê îro hilbijartinên pêşwext ên Parlamentoya Iraqê di saet 07.00’an de dengdana giştî destpê kir û dê heta saet 18.00’an dengdan berdewam bike.
Li gorî Komîsyona Bilind a Hilbijartina Serbixwe ya Iraqê 23 milyon û 986 hezar û 841 kesan mafê dengdanê hene ku ji van milyonek û 196 hezar dengên taybet in ku di 8’ê cotmehê de çûn ser sindoqan.
Di dema dengdanê de dê 343 hezar karmand li ser kar bin û karê hilbijartinê bidin meşandin.
Wê bi giştî li 8 hezar û 283 navendan deng werin dayîn. Li gorî sîstema nû ya hilbijartina Iraqê, Iraq li 83 herêman hatiye parvekirin. Ji bo 329 kursiyên parlamentoyê 3 hezar û 249 namzet dikevin pêşbaziyê ku ji van 951 jin in.
Nûnera Taybet a Sekretê Neteweyên Yekbûyî (NY) ya Iraqê Jenin Plasschaert aşkera kirîbû ku dê 900 kesên biyanî çavdêriya hilbijartina Parlamentoya Iraqê bikin.
Ji sala 2005’an ve ango piştî hilweşîna rejîma Baasê ve 4 hilbijartin pêk hatine. Di sala 2005, 2010, 2014 û 2018’an de pêk hatine.
