Li gorî ajansa ANF’ê ku agahiyên xwe ji çavkaniyên taybet girtine, duh êvarê Saziya Îstixbarata Iraqê li taxa Muselay a bajarê Kerkûkê li dijî sîxûrên dewleta tirk operasyonek lidar xistine. Di vê operasyonê de 3 endamên MÎT’a tirk binçav kirin. Ji kesên hatine destgîrkirin 2 jê Iraqî û yek jî tirk û nasnameya Tirkiyeyê li ser hebûne.
Li gorî çavkaniya agahî dane ANF’ê, binçavkirina van endamên MÎT’ê girêdana wan bi bûyerên teqînewe yên berî niha bi çendekê li taxa Mûselay a Kerkûkê pêk hatibûn ve heye. Çavkaniyê anî ziman ku Serokê Eniya Tirkmen Erşad Salih û dîsa Hesen Toran ketine nava hewldanan ku endamên MÎT’a tirk ji destê iraqiyan rizgar bike, lê belê heta niha hewldana wan bi serneketiye.
Di van demê dawî de êrîşî goristana tirkmenên li bajarê Kerkûk hate kirin, her wiha di nava du rojên dawî de jî çend bombeyên hatibûn danîn li taxa Mûselay a Kerkûkê jî ji aliyê hêzên ewlekariyê ve hatibûn dîtin.
Li gorî çavdêrên siyasî ev bûyerên nava hefteyên dawî de qewimîn destê MÎT’a tirk têde heye û bi vê yekê dixwazin dewleta tirk ji bo di bin navê parastina tirkmenan de êrîşî Kerkûkê bikin. KERKÛK
