Ji bo şermezarkirina êrîşên dewleta tirk a dagirker ên li dijî Herêmê Parastinê yên Medyayê û Bakur û Rojhilatê Sûriyê Tevgera Ciwanên Şoreşger a Sûriyeyê û Yekitiya Jinên Ciwan li navçeya Şeran a Kobanê çalakiya konvedanê li dar xist.
Li navçeya Şêranê ya Kobanê, îro li dijî êrîşên dewleta tirk a dagirker û hevkariya PDK’ê ya bi dagirkeriyê re Tevgera Ciwanên Şoreşger û Yekitiya Jinên Ciwan çalakiya konvedanê li dar xist. Ji Kongreya Star, Saziya Çand û Hunerê ya Baqî Xido û partiyên siyasî gelek kes tev li çalakiyê bûn.
Di çalakiyê de bi navê çalakgeran Firyal Temî daxuyaniyek da.
Firyal Temî bal kişand ser seferberiya ku bi pêşengiya tevgerên ciwanan beriya 20 rojan hate ragihandin û anî ziman ku ciwan deyndarê gerîla ne.
Endama Yekitiya Jinên Ciwan Firyal Temî diyar kir ku dewleta tirk a dagirker bi çekên qedexekirî yên kîmyewî êrîşî gerîla dike, PDK jî piştgiriya dagirkeran dike û êrîş şermezar kir.
Firyal Temî got, divê her ciwanek tev li seferberiya li dijî dagirkerî û xiyanetê bibe û got: “Em ji vê derê heta çiyê, gerîla silav dikin.”
Çalakiya konvedanê wê heta 2 rojan dewam bike.
