Li paytexta Îngilistanê Londonê bi tevlibûna sê kurdistaniyan ve greva birçîbûnê ya bêdem û bêdorveger dest pê kir
Ji bo bidawîbûna tecrîdkirina Rêberê Gelê Kurd Abdullah Ocalan li paytexta Îngilistan Londonê greva birçîbûnê ya bêdem û bêdorveger dest pê kir. Grev êvara 14’ê adarê li Navenda Civaka Demokratîk a Kurd bi daxuyaniyeke çapemeniyê dest pê kir. Çalakî bi beşdariya Nahîde Zengîn, Mehmet Saît Yilmaz û Alî Poyraz pêk tê.
Ji berxwedêrên greva birçîbûnê Nahîde Zengîn diyar kir ku di vê pêvajoya berxwedana dîrokî de bêdengî li mirovbûnê nayê û got ku wan jî xwestin di vê demê de bi rola xwe tevbigerin. Zengîn destnîşan kir ku gelê kurd dîlgirtina Rêberê xwe roja destpêkê jî qebûl nekir îro jî qebûl nake.
Berxwedêr Mehmet Saît Yilmaz jî ev tişt anî ziman: “Her çalakiya li dijî faşîzm û paşverûtiyê hêja ye, lê belê tu çalakî ne biqasî greva birçîbûnê ye ku beden kêlî bi kêlî dihele. Lewma em berxwedana ku 128 roj in didome silav dikin û dibêjin, di vê berxwedanê de em jî hene.” LONDON
