Derket holê ku li navçeya navendî ya Îdirê li mala polîsan a 38 odeyî 374 hilbijêr hatine qeydkirin
Beriya hilbijartina 31’ê adarê nelirêtî, lîstik û hîleyên li dijî pîvanên hilbijartinê roj bi roj derdikevin holê. Berê li Sêrt, Şirnex, Riha û Nîgdeyê li ser navnîşanekê bi sedan hilbijêr hatin qeydkirin. Niha jî li Îdirê derket holê ku li heman navnîşanê bi sedan hilbijêr hatine qeydkirin.
Li gorî nûçeya Ajansa MA’yê li navçeya navendî ya Îdirê li mala polîsan a 38 odeyî 374 hilbijêr hatine qeydkirin. Di pergala Kontrola Navnîşana Malan a ku Saziya Bilind a Hilbijartinê (YSK) da partiyên siyasî de derket holê ku li Mala Polîsan a li kolana Işin a taxa Sogutlu ya navçeya navendî ya Îdirê 374 hilbijêr hatine qeydkirin. Di pergalê de hat dîtin ku piraniya hilbijeran mêrê temenê wan di ser 25 salî re ne. Di pergalê de ji hilbijêran tenê 7 kes li ser nifûsa Îdirê qeydkirî ne. Kesên hatine qeydkirin piranî temenê wan 29-45 salî ne. Balkêş e mêvanxane tenê ji 38 odeyan pêk tê.
Piştî ku YSK’ê lîsteya hilbijêran li keyatiyan daliqand, derketibû holê ku li ser xaneyekê hêjmarên zêde hilbijêr hatine qeydkirin. Nûnerên partiyan li dijî vê yekê serî li YSK’ê dan. YSK’ê jî têkildarî nelirêtiyên qeydan giştîname ji hemû saziyên xwe yên navçe û bajaran re reşand . Yên ku li wê navçeyê rûnanin dê qeyda wan bê cemidandin. YSK’ê di 12’ê çileyê de daxuyanî da û diyar kir ku piştî vekolînê yên li cihê lê dijîn rûnanin dê qeydên wan bên cemidandin. ENQERE
