Navenda Nûçeyan |
Navenda Ragihandin û Çapemeniyê ya HPG’ê bi daxuyaniyekê ragihand ku hêzên wan li herêma Bagokê ya Mêrdînê li dijî artêşa tirk çalakî kirin.
HPG’ê da zanîn ku hêzên wan di çarçoveya Pêngava Tolhildanê ya Şehîd Medya Mawa û Şehîd Rizgar Gever de li qada Navsera Bagokê ya herêma Bagokê ya Mêrdînê li dijî artêşa tirk ku qereqoleke nû çêdikir, di 3’yê nîsanê saet di 13:00’an de çalakiyek kirin.
HPG’ê destnîşan kir ku hêzên wan ji cihekî nêz li kozik û wesayîtên leşkeran xistin û ji du baskan ve li wan reşandine. Daxuyanî wiha dom kir: “Hêzên me heta çûn ser wesayîtên dijmin û dest danîn ser hin belge û dokumanên di hundirê wesayîtan de. Di encama vê çalakiyê de 5 endamên îstîxbarata leşkerî hatin kuştin.”
Daxuyaniya HPG’ê wiha bi dawî bû: “Piştî çalakiyê artêşa TC a dagirker bi çekên giran li derdorê reşand û leşkerên xwe yên mirî û birîndar êvarê bi wesayîtên zirxî ji herêmê birin. Yekîneya me ya ku çalakî kir bi rengekî serkeftî li baregehên xwe vegeriya.”
