Polîsên dewleta tirk li navçeyên Qoser, Nisêbîn û Artuklu yên Mêrdînê bi ser gelek malan de girt. Di serdagirtinê de hevserokê HDP’yê Mêrdînê Salih Kuday û seroka Odeya Tabîban a Mêrdînê Derya Etem jî di nav de gelek kes binçav kirin
Polîsên dewleta tirk îro di danê sibehê de li navçeyên Qoser, Nisêbîn û Artuklu yên Mêrdînê bi ser gelek malan de girtin. Di encama serdegirtina malan de hevserokê Partiya Demokratîk a Gelan (HDP) ê Mêrdînê Salih Kuday, endamên partiyê Neda Alper û Emel Oran û seroka Odeya Tabîban a Mêrdînê Derya Etem jî di nav de gelek kes hatin binçavkirin.
Hat zanîn ku polîsan piştî ku li mala Etem lêkolîn kirin, piştre jî derbasî odeya wê ya li nexweşxaneyê bûn û di odeyê de jî lêkolîn kirin.
Kesên ku hatine binçavkirin piştî kongrola tenduristiyê birin Midûriyeta Emniyetê ya Mêrdînê. Di heman demê de biryara heta 24 saetan qedexeya hevdîtina bi parêzeran re hate dayîn. MÊRDÎN
