Wezareta Karên Navxweyî qeyûm tayînî şaredariyên Qoser, Dêrik, Stewr, Nisêbîn û Şemrexê yên Mêrdîna HDP’ê kiribû. Hevserokên van şaredariyan hatibûn girtin. Hevşaredar û gelek siyasetmedar li Mêrdînê bi hinceta ‘şahidê nepen’ ku li ser wan axivî ye hatine girtin. Rastiya ‘şahidê nepen’ derket holê ku tiştek wiha nîne û sexte ye. Şahidên nepen li dosyeyên girtinê yên hevşaredar û siyasetmedarên HDP û DBP’yî hatine barkirin. Dadgehê xwest şahidên nepen ên bi navê ‘B19O9L6D2P0L1T5’, ‘C1N9K1K8L (Çanakkale)’, ‘1KO3SOV0A8 (Kosava)’, ‘1AN4K0AR2A (Ankara)’, ‘1ES9R6ZPS8RN’, ‘1T4PK6P51’ û ‘Boksor’ werin guhdarkirin.
Di danişîna doza Hevşaredara Qoserê Nîlufer Elîk Yilmaz û Hevşaredara Stewrê Gulistan Oncu dadger xwest şahidên nepen werin guhdarkirin. Lê belê şahidên nepen ên navê wan derbas dibe derket holê ku navê wan di Bernameya Parastina Şahidiyê de nîne.
Gelek siyasetmedarên li herêma Mêrdînê di çarçoveya îfadeyên van şahidên nepen de hatine girtin û hin ji wan ne girtî û hin ji wan girtî tên darizandin. MÊRDÎN
