Yekem ketina PDK’ê ya bi şêweyê operasyon li herêma Metînayê bi rêya Hêzên Hevbeş û Zîrevanên Sînorî yên Iraqê pêk hat. Ji bo ku li herêmê bingehekî ava bike û rê neda ku di rojevê de cih bigire, hêzên xwe di nav hêzên Zîrevanên Sînor yên Iraqê de şand. Piştî wê êdî her ku çû hêzên xwe yên taybet û kirêgirtî xist dewrê. Di encama salekê de bê ku çeper û xalên biçûk werin hejmartin, bi dehan baregeh û xalên asayîşê li herêma Metînayê hatine avakirin. Li vir rastiya vê tevgerê baş derdikeve. Di dîroka başûrê Kurdistanê de tu caran di nava salekê de li herêmekê evqasî baregeh ne hatine danîn. Di navbera her baregehî û ya din de hin cih yek hin cih 2 kîlometre heye. Hemwextiya tevgera PDK a berfireh û operasyonên dewleta tirk a dagirker li herêmê, mezinbûna plana li ser başûrê Kurdistanê û asta ketina PDK’ê di bin kontrola dewleta tirk baş raber dike.
Pêvajoya binkeftina dewleta tirk li herêma Garê erkên nû danî ser milê rayedarên PDK’ê. Heya wê demê dewleta tirk bi girtina agahiyên îstîxbaratî û koordînatên kampên gerîla erka PDK’ê li herêmê sînordar kiribû. Lê piştî binkeftina dîrokî ya ku li Garê xwar û piştî ku hat fêmkirin ew êdî bi teknîka ezmanî û şerê bejahî nema dikare li hember şêwazên gerîlayên pispor şer bike, vê carê PDK jî xist dewrê û bi xwe re kir şîrikekî aşkera. Ji wê demê ve, li Qendîl, Metîna, Şêladizê, Xelîfan û bi giştî Herêmên Parastinê yên Medyayê PDK amadekariya dorpêçeke mezin kir û kemîn avêtin pêşiya hêzên gerîla. Bûyera herî dawî ya li herêma Xelîfanê jî vê yekê baş radixe ber çavan.
Ji 5’ê hezîranê û vir ve PDK çi kir?
Di roja 5’ê hezîranê de hêzên PDK’ê bi awayekî aşkera bi tevgera xwe ya li herêmên Çarçêl û Hekarî ya Metînayê îlana şer kir. Bi amadekariyên ku tu carî ji aliyê PDK ve ne hatiye dîtin, hêzên xwe derbasî herêma Çarçêl û Hekkarî a Metînayê kir. Ew roj destpêkirina provakasyona nû ya ku ji aliyê dewleta tirk ve hatibû amadekirin.
Dewleta tirk ji vê provakasyonê çi dixwest bi dest bixe?
Artêşa dewleta tirk ku di meha gulanê de li herêma Tabura Ereban û li Zendûrayê têk çû û çi encam bi dest nexist. Li ber vê yekê bû ku binkeftina wî fermî were îlankirin. Ew artêş êdî hemû hêviyên xwe qût kir. Lê dema ku PDK’ê dest bi vê tevgerê kir, gelek mijar hatin guhertin. Di serî de li herêma Zendûra hêzên gerîla neçar man ku taktîkên xwe yên şer biguherin û derbasî qonaxekî nû bibin. Ev yek jî bû sedem ku şehadeta 6 gerîlayan pêk were. Li aliyekî din li herêma Çarçêl û Hekkarî Hêzên gerîla ji bo ku nekevin şerekî bi hêzên PDK’ê re û ew provakasyon pêk neyê gelek caran bi xwînsarî tevdigerin. Dîsa bi taybet li herêma Metînayê pêwîstî hat dîtin ku tevgerîna gerîla bi giştî berçav re were derbaskirin. Ev yek jî bandorekî mezin li têkoşîna gerîla ya li dijî dagirkeriyê kir.
Hêzên li Metînayê
Li herêma Metînayê ji aliyê 2 hêzan ve tevgera PDK pêk tê. Li xeta bakurê herêma Metînayê ango ji navçeya Kanî Masî û heya navçeya Batufa PDK tevgera xwe bi rêya foca 2 û 3 a girêdayî lîwaya 4’emîn a hevbeş pêk tîne. Li aliyê Başûrê Metînayê jî, ango ji Serê Metînayê û heya Girên Çarçêl û Hekkarî PDK tevgera xwe bi rêya hêza Zîrevanî pêk tîne. Di binya vê hêzan de, hêzên Komando û Çeteyên Roj jî cih digrin. Her çendî navê ‘pêşmerge’ bi kar bînin jî, di van çeperên ku li dijî gerîla ava dikin de tu pêşmerge cih nagire û hemû hêzên kirêgirtî yên PDK’ê û mala Barzanî ne.
Hêza Zêrevan ji kê pêk tê?
Hêza Zîrevanî ew hêz e ku berpirsê parastina malbata Barzanî ye. Erka duyemîn a vê hêzê ew e ku ewlehiya çûyîn û hatina bejahî ya artêşa dewleta tirk a dagirker bigire. Di nav vê hêzê de rêxistinbûneke zêde ya dewleta tirk heye. Bi zimanekî din, ev hêz ji aliyê dewleta tirk ve jî tên erkdarkirin. Ji bo vê yekê ev hêz hat hilbijartin ku derbasî herêmên gerîla bibe. Beşek ji perwerdehiya ku ev hêz jî girtî, ji bo şerê li dijî gerîla pêk hatiye.
Operasyona nû ya PDK’ê
Di roja 2’yê îlonê de hêzên PDK’ê bi şev carekî din hêzên xwe şand herêma Metînayê û çend baregehên nû ava kir. Her wekî din li gorî agahiyan wê di rojên pêş de çend baregehê din jî li vê herêmê bi cih bike. Ev tevgera dawî, bi armanca qûtkirina hemû rêyên bejahî û rênedana derbasbûna pêwîstiyên lojistîkî ji bo hêzên gerîla pêk hat. A din, ev tevger û bi desteka kamerayên mobese û teknîkên çavdêriyê armanc dike ku bi ziravî giştî bejahiyê bixe bin kontrola xwe û bi vê yekê tevgera gerîla bişopîne. Bi kurtî, tişta ku dewleta tirk nikare bike PDK pê radibe. Ev jî rastiya ketina mezin û xeta îxanetê ya li gel dagirkeriyê cih digire, radixe ber çavan. BEHDÎNAN
