Di çarçoveya xebatên Yekitiya Neteweyî ya bi dirûşmeya ‘Dem dema yekitiya neteweyî û azadiyê ye’, şandeya ku ji Kongreya Civaka Demokratîk (KCD), Partiya Herêmên Demokratîk (DBP), Partiya Demokratîk ya Gelan (HDP) û Tevgera Jinên Azad (TJA) pêk tên, îro li Nisêbîna Mêrdînê starta xebatên xwe dan. Xebatên ku dê 7 rojan berdewam bike, di roja yekem de bi astengiya polîsan ve dest pê kir. Şande îro li Nisêbînê esnafan ziyaret kir û di destpêka serdanê de hevseroka DBP’ê Salîha Aydenîz têkildarê xebatên ku bên kirin de axivî.
Aydenîz da zanîn ku demek dirêj e ji bo yekitiya neteweyî dixebitin û wiha got: “Li navçe û bajaran ji bo yekitiyê xebatên me didomin. Çalakiyên me bê guman hatin astengkirin û rastî êrîşan hatin. Lê dîmenên ku me îro dîtine gelek cuda ne. Cihên hatin çûyîna Nisêbînê hatin girtin. Bi sedan polîs li dora me kom bibûn. Hûn dizanin li Garê êrîşa dewletê heye. Leşkerên wan ên hatine girtin cardin ji aliyê dewletê ve hatin kuştin. Niha jî bi wê kînê nêzî me dibin. Lê divê em bi vîn xebatên xwe berdewam bikin. Em ê ligel astengiyan bimeşin.”
Piştî axaftinê, ligel astengiya polîsan şande çû serdana esnafan. Ji aliyê esnafan ve bi eleqeyek mezin hatin pêşwazîkirin. Welatiyên derdorê jî bi çepikan wan pêşwazî kirin. MÊRDÎN
