Rojên Çanda Kurd a Nurnbergê, bi konsera hunermenda Fransayî Eleonore Fourniau û Suleyman Çarnewa dest pê kir
Rojên Çanda Kurd ku bi pêşengiya Mala Gel a Medyayê ku her sal li bajarê Nurnbergê yê Almanyayê pêk tê, îsal a 10’emîn bi kêf û xweşî dest pê kir. Di destpêkê de Konê Reş hate vedan ku çand û dîroka kurd lê tê nasandin. Li pêşiya Konê Reş Koma Govendê ya Zarokan a Astera, Koma Govendê ya Ciwanan û Koma Govendê ya Jinan govenda gelek herêmên Kurdistanê gerandin.
Piştre bi sedan Kurdistanî tevî siyasetmedarên alman li salona Çandê ya Villa Leonê li hev civiyan. Bi navê Mala Gel a Medyayê Asya Karataş axivî. Karataş diyar kir, ew Rojên Çandê diyarî Leyla Guven û berxwedêrên greva birçîbûnê dikin û wiha got: “Berxwedana greva birçîbûnê ya bi pêşengiya Leyla Guven dest pê kir, li çar parçeyên Kurdistanê bi berxwedana dayikan û ya berxwedêrên zindanan bi ruhê fedayî bi ser ket. Em şehîdên xwe û berxwedêran hemûyan bi rêzdarî silav dikin û Rojên Çandê diyarî berxwedêrên greva birçîbûnê dikin.”
Piştre hunermenda Fransayî Eleonore Fourniau ku gelek stranên kurdî distirê derkete ser dikê û bi zaravayên Kurmancî, Kirmançkî û Soranî stran got. Suleyman Çarnewa jî konserek da. 10’emîn Rojên Çanda Kurd a Nurnbergê dê çar rojan bidome. NURNBERG
