Tîma Destwerdana Destpêkê ya Meclisa Sivîl a Reqqayê di encama lêkolînan de li Goristana Fexîx a Reqqayê 304 cenaze ku gelemperî aîdê zarok û jinan bûn, derxistin
Piranî jê jin û zarok, li Goristana Fexîx a Reqqayê 304 cenaze hatin derxistin. Goristana Fexîxê li başûrê baregeha Telaî Baas a berê ye û berfirehiya wê nêzî 20 donim e. Ji roja rizgarkirina Reqqayê heta niha li vê goristanê 8 gorên komî hatin dîtin.
Tîma Destwerdana Destpêkê ya Meclisa Sivîl a Reqqayê derxistina cenazeyan ji gelek cihên li bajarê Reqqayê dewam dike. Goristana Fexîxê jî yek ji wan herêmane û tîmê destwerdanê heta niha 304 cenaze derxistine. Beriya niha jî di vê goristanê de 4 cihên komî hatibûn dîtin.
Piraniya cenazeyan dan malbatên wan
Têkildarî mijarê berpirsê Tîma Destwerdana Destpêkê ya Meclisa Sivîl a Reqqayê Yasîr El Xemîs anî ziman ku li ser daxwaza gel û meclisên herêmî, ji 9’ê çileyê ve li Goristana Fexîxê xebatên lêgerînê dikin. El Xemîs destnîşan kir ku 304 cenaze ji goristanê hatine derxistin û wiha domand: “Nasnameyên gelekan jê hatine diyarkirin. Piraniya cenazeyan radestî malbatên wan hatin kirin.”
Xebatên wan berdewam in
Di berdewamê de jî El Xemîs daxuyand ku piraniya cenazeyên hatine dîtin aîdê jin û zarokanin û wiha dawî li axaftina xwe anî: “Li beşek ji herêma Fexîxê zeviya çandiniyê ye. Parçeyek ji bo navenda lêkolînên çandiniyê hatiye veqetandin û goristana wê jî ji 4 beşan pêk tê. Heta niha tenê li ser 2 beşan xebat hatiye kirin. Xebatên derxistina cenazeyan a xebatkarên me didome. Me ji her çar aliyên Reqqayê cenaze derxistin.” REQQA
