Duh li gelek bajarên rojhilatê Kurdistanê pêngava hêzên dewleta Îranê ya serdegirtina malên welatiyan, binçavkirin û girtina xwepêşander û çalakvanan berdewam bû. Ev yek di demek wiha de ye ku bi biryara Rêberê Komara Îslamî ya Îranê Elî Xamaneyî ya lêborînê, rojane xwepêşanderên girtî têne berdan.

Her duh melayê mizgefta gundê Marexan a bajarê Serdeşt Fethula Rostemî, di dema ku refaqetiya karwanê alîkariya ji bo mexdûrên erdhejê yên bajarê Xoy’ê dikir, li xala kontrolê ya bajarê Urmiye ji aliyê hêzên ser bi dewleta Îranê ve hat binçavkirin û ber bi cihek nediyar ve hate birin.

Ji destpêka xwepêşandanên Serhildana ‘Jin, Jiyan, Azadî’ heta niha ve, 27 melayên kurd bi tohmeta piştgiriya xwepêşanderan vexwendine dadgehê û ji wan herî kêm 10 mela hatine girtin.

Li bajarê Îlam yê rojhilatê Kurdistanê xwepêşdandera girtî yê bi navê Arîn Kuxayî ji ber çaresernekirina dosyeya wê, bi dirûna lêvên xwe dest bi grevê kir.

Duh li bajarê Mihabad bi tevlîbûna malbat û hêjmarek çalakvanan, merasîma rojbûna xwepêşanderê di xwepêşandanan de jiyana xwe ji dest dayî Zanyar Ebubekirî hat li darxistin. Her wiha bi boneya salvegera Komploya Navneteweyî ya li dijî Rêberê Gelê Kurd Abdullah Ocalan, çalakiyên cur be cur hatin li darxistin û tê de Komplo û tecrîd hatin şermezarkirin.

Her wiha di heman çarçoveyê de Ciwanên Apoyî li bajarê Bane û Jinên Apoyî li bajarê Sine Komplo û tecrîda beramberî Rêberê Gelê Kurd Abdullah Ocalan şermezarkirin.

Li ser asta Îranê jî nerazîbûnên li dijî desthilatê bi awayên cuda cuda bi taybet nivîsîn û hilawistina dirûşmeyan li cihên giştî û li ser banên malan berdewam bûn. Duh komek çalakvan banga li darxistina xwepêşandan û çalakiyên giştî ku di 17’ê sibatê de ango salvegera çileya xwepêşander Mihemed Mehdî Kerîmî û Mihemed Hisên ku ji aliyê dewleta Îranê ve hatîn darvekirin, kirin.

Di çarçoveya bangawaziyê de li gelek bajarên Rojhilatê Kurdistan û Îranê belavokên bangawaziyên hatin belavkirin.