Li Şehbayê bi sedan endamên Kongreya Star û Yekitiya Jinên Ciwan ên herêma Efrînê bi meşekê tecrîda li ser Rêberê Gelê Kurd Abdullah Ocalan şermezar kirin.
Di meşê de posterên Ocalan, alên Kongreya Star û Yekitiya Jinên Ciwan hatin hildan.
Meş ji pêşiya deriyê ketina bajarokê Til Qerah ê navçeya Ehdasê dest pê kir. Jinan bi yekdengî diruşma tecrîdê şermezar kirin û banga azadiya fîzîkî ya Rêbertî kirin.
Meş li ber navenda Meclisa Malbatên Şehîdan a li Til Qerah rawestiya û deqeyeke rêz hate girtin.
Ji endamên Koordînasyona Kongreya Star a Bakur û Rojhilatê Sûriyeyê Eyşe Mihemed behsa sedemên tecrîdkirinê kir û wiha got: “Dewletên dij demokrasiyê tecrîdeke giran li ser Rêbertî ferz kirine, hewl didin ku me ji dûrî ramanê azad bixin û gelan kole bikin.”
Endama Rêveber a Yekitiya Jinên Ciwan a Kantona Efrînê Rîm Dada bi navê jinên ciwan axivî û got ku dê têkoşîna li ser şopa xeta Rêbertî berdewam bikin û wiha domand: “Rêbertî doza jinan di civakê de lêkolîn kir û hişt ku di hemû qadan de bibin pêşeng ku berê hatibûn paşguhkirin. Ji ber vê yekê divê em ji vê xetê dûr neçin û nehêlin ku dijber armancên xwe bigihînin serî.”
Rîm Dada bang li ciwanan, di serî de jinên ciwan kir ku li dijî tecrîdê serî hildin û têkoşîna xwe li dijî dewleta tirk xurt bikin.
Çalakî bi diruşmeyên şermezarkirina tecrîdê bi dawî bû. ŞEHBA
