Li Şengalê pêngava boykotkirina malên tirkî hate destpêkirin. Rêveber û welatiyên bajar xwestin ku hemû şengalî tev li kampanyayê bibin û tiştên tirkan nekirin
Meclisa Xweseriya Demokratîk a Şengalê (MXDŞ) li dijî êrîşên dewleta tirk ên li ser Şengalê, di 7’ê mijdarê de civînek lidarxistibû û biryara boykotkirina malên tirk dabû. Her wiha ji bo agahdarkirina gel jî li Şengalê komîteyek hatibû avakirin.
Piştî hefteyekê ku xebat hatin meşandin di 13’ê mijdarê de pêngava boykotkirina malên tirkî li Şengalê û her wiha li bajarokên Sinûn, Xanesor û hinek gundan hate destpêkirin. Li gund û bajarokên Şengalê her wiha belavok tên belavkirin. Di belavokan de bang li welatiyan tê kirin ku malên tirkan nekirin û girîngiyê bidin malên xwemalî.
Bang kir
Têkildarî mijarê hevserokê Meclisa Gel a Sinûnê Xwedêda Eliyas axivî û wiha got: “Em bi rêya belavokan ji esnaf û welatiyan re dibêjin ku malên tirkan nekirin. Kirîna malên tirk piştgiriya ji bo dagirkeriyê ye. Em bang li hemû Şengaliyan dikin ku malên tirkan nekirin.”
‘Hewcehiya Şengalê bi malên tirkan nîne’
Welatiyê bi navê Omer Mirad jî diyar kir ku ew ji pêngava boykotkirina malên tirkan keyfxweş e û wiha dom kir: “Hêvîdarim ku gel êdî tiştên tirkan nekire. Rewşa Şengalê gelek başe. Li şûna tiştên biyanî divê em girîngiyê bidin tiştên xwemalî. Li Şengalê her tiştên me heye ku em karibin pê debara xwe bikin.” ŞENGAL
