Welatiyên ji Serêkaniyê koçber bûn da zanîn ku di êrîşên dewleta tirk û çeteyên wê de wan şahidiya qetilkirina bi dehan sivîlan kiriye. Welatiyan diyar kir ku komên çete mal û milkê gel talan û wêran kiriye û welatiyên vedigerin jî qetil dikin û îşkence dikin
Ji ber êrîşên artêşa tirk a dagirker û çeteyên wê yên li dijî rojavayê Kurdistanê, zêdetirî 300 hezar kes ji Serêkaniyê û Girê Spî koçber bûn. Gelemperiya koçberan li herêmên weke Hesekê, Qamişlo, Reqa û herêmên din ên di bin kontrola HSD’ê de bi cih bûn. Gelek koçber jî li navçeya Şedad a Hesekê bi cih bûn. Li gorî daneyên Meclisa Sivîl a Şedadê heta niha 150 malbat li navçeyê û gundên wê bi cih bûne.
Yek ji van malbatan jî malbata Emîna Dexîm (60) e. Malbata Dexîm ji gundekî Serêkaniyê bûn û ji ber êrîşên dagirkeriyê neçarî koçberiyê bûn. Endamên malbata Emîna Dexîm têkildarî serpêhatiya xwe ji ANHA’yê bi Basim Dexîl re axivîn. Emîne Dexîm anî ziman ku dewleta tirk û çeteyên wê hewl didin malbatên çeteyan li malên wan bi cih bikin û bi vê yekê re jî demografyaya herêmê biguherînin.
‘Me şahidiya qetilkirina bi dehan mirovan kir’
Di berdewamê de jî Dexîl ev tişt destnîşan kir: “Dema ku artêşa dewlet tirk Serêkaniyê topbaran dikir, me şahidiya qetilkirina bi dehan sivîlan kir. Ji ber tirs û qetilkirinê, malbata me bi tenê cilên xwe ji Serêkaniyê derketin. Em niha 5 malbat di xaniyekî de dijîn. Hêviya me ew e ku rêxistinên mirovî û dewletên cîhanê alîkariya me bikin.”
Talan, dizî û kuştin
Ji endamên malbatê Xalid Dexîm jî dibêje ku dema li Serêkaniyê, çeteyên girêdayî dewleta tirk bi dehan kes li ber çavên wan qetil kirin û ev agahî dan: “Dewleta tirk û çeteyên wê mal û milkê welatiyên li malên xwe vegeriyan desteser kirin. Çeteyan mal û milkê wan talan kir, ew bi xwe jî îşkence kirin û qetil kirin. Her wiha depoyên geniman wêran kirin, jenerator dizîn û şandin Tirkiyeyê. Ez bi hin hevalên xwe yên li Serêkaniyê re axivîm. Ji min re gotin; ‘Çete hê jî li bajêrin û ez venagerim. Ji ber ku yên vedigerin qetil dikin û îşkence dikin.’ Ez bang li rêxistinên mirovî û navdewletî dikim ku alîkariyê bidin me da ku li xaka xwe vegerin.” HESEKÊ
