Şervanên HSD’ê li Serêkaniyê, Girê Spî û Minbicê derban li hêzên dagirker didin. Li hêla din jî hêzên dagirker bênavber herêmê bombebaran û topbaran dikin
Berxwedana dîrokî ya şervanên Hêzên Sûriyeya Demokratîk (HSD) a li dijî hêzên dagirker ên dewleta tirk û çeteyên wê ya li seranserî rojavayê Kurdistanê didome. Di saetên dawî de bi taybet jî li Serêkaniyê, Girê Spî û Minbicê şerekî dijwar rû da.
Di vê çarçoveyê de şervanên HSD’ê li konvoyeke leşkerî ya artêşa tirk û çeteyên wê ku dixwest ji gundê Yabisê ber bi gundê Sikeriyê yê li rojavayê Girê Spî ve biçe xist. Hat zanîn ku di encama çalakiyê de gelek kuştî û birîndarên dijmin çêbûn lê hejmara wan nehat zelalkirin. Li taxa Eyn Arûs a li başûrê Girê Spî jî mayînek bi çeteyan ve hate teqandin û 4 çete hatin kuştin.
Berxwedana Serêkaniyê
Artêşa tirk di van kêliyan de gundê Menacir û navenda Serêkaniyê bi balafiran bi dijwarî bombebaran kir. Di heman demê de li gundê Menacirê şervan derbên giran li çeteyan didin û şerekî dijwar heye. Hêzên dagirker ji serê sibehê ve bi tank û panzêran êrîşî gund dikin. Di heman demê li ser asîmanê herêmên navborî balafirên keşfê digerin.
Şerê li Minbicê
Komên çete yên girêdayî dewlet tirk di heman demê de êrîşî gundên El Cat û Yaşlî yên li rojhilat û gundê Ereb Hesen ê li bakurê rojavayê Minbicê kirin. Li ser vê yekê jî şervanên Meclisa Leşkerî ya Minbicê bersivên tund dan û êrîşa li ser gundê El Catê şikand. Di pevçûnan de 4 çete hatin kuştin û wesayîteke leşkerî jî hate rûxandin. Niha li gund aramî heye. Di pevçûnên li gundê Ereb Hesen de jî 2 leşkerên hêzên rejîma Sûriyeyê jiyana xwe ji dest dan û sê jî birîndar bûn. Pevçûnên li gundê Yaşliyê jî bi hemû dijwariya xwe didome.
