Girtiyê bi navê Bişar Bîlen ku li Girtîgeha Jimar 1 a Tîpa T ya Tarsûsê dimîne, bi rêya malbata xwe da zanîn ku rêveberiya girtîgehê pêkanînên keyfî dike. Bîlen diyar kir ku ji mafên herî biçûk jî tên mehrûmkirin û yên ku li dijî van pêkanînan derdikevin jî tên sirgûnkirin
Binpêkirinên li girtîgehên bakurê Kurdistanê û Tirkiyeyê bênavber didomin. Têkildarî binpêkirinên li Girtîgeha Jimar 1 a Tîpa T ya Tarsûsê, girtiyê bi navê Bişar Bîlen di hevdîtina di 17’ê kanûnê de bi rêya birayê xwe agahî parve kirin.
Bîlen di serî de ji bo bidawîkirina binpêkirinên li girtîgehan, bang li hemû parêzvanên mafên mirovan kir û wiha got: “Rêveberiya girtîgehê li dijî mewzûata qanûnî tev digere. Em nikarin sûdê ji mafên xwe yên ji bo çalakiyên civakî û çandî sûd bigirin. Pirtûk, kovar û rojname hatine qedexekirin. Îdareya girtîgehê bi awayekî keyfî her tiştî biha dike. Ava germ nadin. Hevalên me yên nexweş sewqî nexweşxaneyê nayên kirin. Gava em nerazîbûnên xwe nîşan didin jî me dişînin deverên dûr ên wekî Behra Reş. Ji bo vê em bang li parazvanên mafên mirovan û raya giştî dikin.”
Der barê mijarê de birayê Bîlen, Alî Bîlen jî da zanîn ku girtiyan ji bo bidawîkirina van binpêkirinan xwestine bi rêveberiya girtîgehê re hevdîtina bike lê nehatiye qebûlkirin. Bîlen diyar kir ku ji bo bidawîkirina van binpêkirinan dê têkoşîna xwe bidomînin. MÊRSÎN
