Li bajarê Vûhan ê Çînê nexweşiya vîrûsa koronayê (Kovid-19) dest pê kir, her ku diçe berbelavî cîhanê dibe. Vîrûs gihîşt Îranê û heta niha 5 kesan jiyana xwe ji dest da. Ji ber ku bajarê Wanê di sînorê Îranê de ye rê li ber metirsiyên vê vîrûsê vekir. Her sal bi deh hezaran kesên ji Îranê tên serdana Wanê. Tevî ku vê vîrûsê rê li ber metirsiyê vekiriye jî Deriyê Sînorê Kapikoy yê li navçeya Seraya Wanê ku derbasî Îranê dibe hêj vekiriye.
Endamê Desteya Rêveberiya Odeya Bijîşkan a Wan-Colemêrgê bijîşk Huseyîn Yavîç têkildarî tedbîrên ji bo Wanê li dijî vê vîrûsê werin girtin axivî.
Metirsî hene
Dr. Huseyîn Yavîç destnîşan kir ku vîrûsa koronayê ya ku her diçe li Îranê berbelav dibe li Wanê jî rê li ber metirsiyekê vedike û û heta niha li Wanê bi bûyerek wiha rû nedaye û da zanîn ku tevî vê yekê jî hêj li Wanê tedbîrên cidî nehatine girtin û ji ber vê yekê jî xelk di nava metirsiyê de ye.
Yavîç diyar kir ku li dijî vê nexweşînê ango vîrûsê divê saziyên peywîndar tedbîrên pêwîst bigirin û di çarçoveya vê armanca tedbîran de jî divê deriyên sînor ên Îranê bi awayek derbasdar jî werin girtin û her wiha ji bo tedbîran bang li sazî û dezgehên tenduristiyê yên Wanê jî kir ku bikevin nava liv û tevgerê. WAN
