Nivîsa Têkoşîna Axîn a li ser şehîd Dilgeş Zîlan Gûzereş nivîsandiye û di ANF’ê de hat weşandin bi we re parve dikin:
Fermandarê pêşeng ku her kêliya jiyana xwe ya gerîlatiyê bi têkoşînê derbas kir û karên serkertî kir; şehîd Dilgeş Zîlan Gûzereş mîrateyeke berxwedanê ya mezin li pey xwe hişt.
Bi hezaran ewladên leheng ên Kurdistanê ji bo welatê xwe ji dagirkeriya dijmin rizgar bikin, bi lehengî têkoşiyan. Yek ji lehengên Kurdistanê jî Dilgeş Zîlan Gûzereş (Ferhat Akdenîz) bû.
Ferhat Akdenîz ê ji gundê Gûzereşê yê Çelê ya Colemêrgê, ji ber ku malbata wî neçar ma koçî Geverê bike, li Geverê ji dayik bû. Akdenîz ê ji eşîra Pinyanîş a welatparêz bû, partî zû nas kir. Ji ber ku ji malbat û derdora wî tevlîbûn li nava refên Têkoşîna Azadiyê ya Kurdistanê hebû, bala Ferhat Akdenîz li ser gerîla bû. Akdenîz li Geverê di nava serhildanan de mezin bû û li dijî dijmin her tim li refên herî pêş ê têkoşînê cih girt.
Akdenîz ku li hemberî êrîşên hovane yên dewleta mêtinger a tirk ên li dijî gelê kurd bêdeng nema, sala 2010’an tevlî nava refên gerîla bû û navê Dilgeş Zîlan Gûzereş li xwe kir. Refên gerîla ji bo Dilgeş meşek bi eşq û baweriyê bû, lewma jî da ser şopa fermandarê efsanewî Egîd. Li her qadê bi ruhê berxwedanê xebitî. Ji ber vê yekê dema ku çeteyên DAIŞ’ê yên dijminê mirovahiyê êrîş bir ser Rojava, derbasî Rojava bû û dest bi parastina gel û welatê xwe kir. Gerîla Dilgeş li hemberî çeteyên DAIŞ’ê bi rengekî fedaî şer kir, di demên herî giran ên şer de li refên herî pêş şer kir. Tevî ku ji serê xwe û lingê xwe du caran birîndar bû, eniya berxwedanê neterikand û di têkbirina çeteyên DAIŞ’ê de kedeke mezin da. Piştî ku çeteyên DAIŞ’ê hate têkbirin, li çiyayên Kurdistanê vegeriya.
Dilgeş Zîlan ku êdî fermandarekî pêşeng bû, di hevpeyvîneke xwe de li ser şer wiha axivîbû: “Ya rast ji sala 2013’an û vir ve em bênavber şer dikin. Nifşê nû yê gerîla ji ber ku nifşekî di nava şer de mezin bûye, dikare bênavber şer bike. Di nava tu artêşê de rewşeke bi vî rengî nîne. Li gel me dudiliyeke biçûk nîne. Em zanin ku di nava şerekî çawa de ne, ji ber vê yekê jî berxwedanên efsanewî têne kirin. Li hemberî dijmin em ti carî paşve gavê neavêjin. Lê belê em serketinên xwe têrker nabînin û her tim li pêşiya xwe difikirin. Berxwedan tê wateya şerekî serketî, şerê herî mezin jî wê serketinê biafirîne. Di serxistina şer de armanc girîng e. Berdêla xwe çi dibe bila bibe ji armanca jiyana azad divê paşve gav neyê avêtin. Bi vî rengî em ê bibin mînak ji nifşên nû re. Mîna ku hevalê Atakan got, em gerîlayên serdema fezayê ne. Ji ber ku ti hêz mîna me kêlî bi kêlî xwe bi pêş naxe.”
Mîna ku fermandarê efsanewî yê PKK’ê Egîd got: “Apoyî mîna bombeyeke ji teqînê re amade ye, dema biteqe wê dijmin tune bike.” Gerîla Dilgeş jî da ser vê şopê û tirs berda dilê dijmin. Ewladê leheng ê gelê kurd Dilgeş li çiyayên azad her roj xurt bû û bi hêrsa tolhildanê ya di dilê xwe de berê xwe da qadên şer. Li ser bingeha mîrateya berxwedanê ya fermandar Egîd têkoşiya. Di jiyana xwe ya gerîlatiyê de gelek wezîfeyên krîtîk bi cih anî. Piştî pratîka serketî ya li herêma garê derbasî Heftanînê bû û beşdarî gelek çalakiyan bû ku derbên giran li artêşa Tirk a mêtinger hate xistin.
Şehîd Dilgeş li quntarên çiya bi eşqa jiyana azad heta nefesa xwe ya dawî li dijî dijmin şer kir. Piştî Heftanînê derbasî Amedê bû û têkoşîna xwe ya li hemberî dewleta mêtinger a tirk dewam kir. Li hemberî ti astengiyan dest ji têkoşînê berneda û li hemberî pirsgirêkan timî bû hêza çareseriyê. Di gerîlatiya serdema nû de li ser xeta serketinê meşiya. Li hemberî êrîşên artêşa dagirkera tirk tevlî gelek çalakiyan bû, bi rengekî fedaî şer kir û derbên giran li dijmin xist. Mîna bi hezaran şehîdên Kurdistanê têkoşîneke nayê jibîrkirin li pey xwe hişt. Di 26’ê Tebaxa 2023’an de tevî hevrêyên xwe Berxwedan Farqîn (Hanîfî Saygi) û Mervan Wan (Mûhterem Koç) tevlî karwanê şehîdan bû.
