Parlamentera HDPyî ya Amedî Salîha Aydenîze persê 42 rojî yo herêma operasyonî de vindarnayîşê cenazeyanê gerîlayanê HPGyî yê ke pêkewtişanê Licê de cuya xo vindî kerdî wezîrê Edaletî Abdulhamît Gulî ra kerde
Wareyê bejikî yê Mehlaya Bayirli ya qezaya Licê ya Amedî de roja 2ê hezîrane operasyono leşkerî ame destpêkerdene. Dimayê pêkewtişanê ke 3ê hezîrane de vejîyayî, hetê teyareyanê şerî ra bombayê kazanî ameyê eştene. Eşkerayîya HPGyî ya derheqê operasyonî de ame pêhesnayene ke netîceyê bombardûmanî yê 3ê hezîrane de Îbrahîm Çelîk (Mahîr Andok), Abdullah Turhan (Rêber Amed) û Omer Demîrê (Serhildan Mazî) HPGyijan cuya xo vînî kerda. Eşkerayîyêka dîyine de zî ame vatene ke herême de heman tarîxî de Felat Kocakaya (Rizgar Tolhildan) û Yusuf Kayran (Zinar Akro) yê HPGyijan zî cuya xo vînî kerda.
Merdimanê kesanê ke cuya xo vînî kerda seba ke cenazeyan bigîrê muracatê Serdozgerîya Komare ya Licê kerdebî. Labelê bi bahaneya ke ‘operasyon dewam keno’ keyeyan rê cenazeyî nêameyî dayene. Keyeyî, seba ke bieşkê cenazeyanê xo bigîrê bi rojan o pawenê, tayê dewijê ke resabî cayê bombardûmanî fotografê 2 HPGyijanê ke cuya xo vînî kerdebî antîbî. Keyeyanê ke nêeşkayî cenazeyanê domananê xo herême ra bigîrê, naye ser seba hetkarîya huqûqîye muracatê Baroyê Amedî kerd. Baroyî, wezîrê Edaletî Abdulhamît Gulî, ke 9ê temmuze de seba tayê temasan amebi Amed, nê problemî ra hayîdar kerdibi. Wezîr Gulî seba girewtişê cenazeyan teşebusê ke lazim ê bêrê kerdene walîyê şaristanî Hasan Basrî Guzeloglûyî rê talîmat dabi. Serê hayîdarkerdişî ra 5 rojî ravêrtê zî cenazeyî hewna herême de yenê vindarnayene. Parlamentera Partîya Demokratîke Şaran (HDP) ya Amedî Salîha Aydenîze zî talîmatê girewtişê cenazeyan wezîrê Edaletî Abdulhamît Gulî ra persa.
Aydenîze, seba ke wezîr Gul cewabê înan bido nê persan ê rê persaye:
* Goreyê hayidarîyanê ke derheqê qewimîyayîşan de çapemenî de vejîyayê 5 cenazeyî estbîyê, ê cenazeyan ra yewe teslîmê keyeyê ci ameya kerdene. Derheqê 4 cenazeyanê bînan de hayîdarîya şima esta?
* Tirêm rast o ke cenazeyî 3ê Hezîrane ra nata herêma operasyonî de yenê vindartene, teslîmê keyeyanê înan nênê kerdene? Eke rast o mazeretê ci çi yo?
* Cenazeyî do key teslîmê keyeyan bêrê kerdene?
* Gama ke mabênê hêzanê asayîşî û hetêkê bînî de pêkewtiş virazêno, operasyonî yenê kerdene yan zî mudaxeleyanê qewimîyayîşanê cimatkîyan de kesê ke cuya xo vînî kenê cenazeyê înan bi kamcîn prosedurî teslîmê keyeyanê înan yenê kerdene? Nê cenazeyî tewr tay û tewr zaf mîyanê çend rojan de keyeyanê înan rê yenê teslîmkerdene? ANQARA
