Ganîkerdiş û domanyîşê kulturê wezîfeyê her merdimî yo. Her merdim mesuldarê dewamkerdişê kulturê xo yo. Lazim o ganî her komel kulturê xo rijnayîş û helîyayîşî ra bipawo û kulturê xo bido heskerdene. Dilîvan Reşîda 16 serrî û Sîlva Reşîda 17 serrî ke wayê yewbînan ê û dewa Kaxirê ya pabesteyê qezaya Mabetayê ya Efrînî de cuyenê. Dilîvan û Sîlva govenda kurdî ra zaf hes kenê. Wirdî wayî bado ke koçê Şehba kenê kişta mektebê xo de xebatanê xo domnenê. Dilîvan û Sîlva derheqê heskerdişê xo yê govenda kurdî de qisey kerdî.
‘Ma bi heskerdişêk gird govenda xo çarnenê’
Destpêk de Dilîvane bale ant serê tewrbîyayîşê xo û waya xo ya Koma Govende û wina va: “Ez û waya xo Sîlva mektebî de wanenê û verê nê de zî ma kultur û hunerî ser o beşê govende de ca gênê. Heskerdişê ma verê ra govenda kurdî rê esto û no heskerdiş ma dir pîl bi, heta ke ma tewrê govende bî. Govende kulturêk verên ya kurdan a û wazenê kulturê xo bipawê. Ganî her ciwanêk verê xo bido merkezê kultur û hunerî û bi heskerdiş kulturê xo bipawê. Lazim o ma kulturê kapîtalîst ra dûr bikewê û kulturê xo bimusê. Heskerdiş û meraqê ma xeylêk seba govende esto û merdim bêmeraq nêeşkeno karêk ra serkewte bibo. Ma bi heskerdişêk gird govenda xo çarnenê. Waştişê ma oyo ke ma bieşkê kulturê xo bipawê û neslê bînan rê bimusnê.”
‘Ma xeylêk şahî û festîvalan de govenda xo ma çarna’
Kênaya bi nameyê Sîlva derheqê xebatê xo yê kulturî de wina va: “Dimayê koçberîyê ma yê Efrînî, min û waya xo fek heskerdişê xo yê govende ra vera nêda. Xeyalê ma her wext gane mendî û m abi ruhêk newe tewrê govende bî. Ma demê xo yê mabêne ê perwerdeyî de bi govende derbaz kenê. Xeylêk şahî, festîval û aktîvîteyê hunerî de govenda xo ma pêşkêş kerda. Ma wazenê ke bi nu ruhî serkewtişê pîlan bi dest bikerê.” ŞEHBA
