Hêrişê îşxalî yê dewleta tirke yê vera herêma Zapî 15ê nîsana 2022î ra nata dewam keno. Vera îşxalî nika têkoşînê gerîlayan tunelanê şerî yê dewa Sîda de dewam keno. Xoverdayoxanê tunelanê şerî yê Sîda ra gerîla Felat Engînî qala têkoşînî kerde.
”Dewleta tirke 2ê êlule ra nata hêrişê xo xurtêr kerdî û verê xo da waranê Sîda û Çemçoyî ke nêzdîyê Şeladîzê de yê. A şewe dişmenî Kampa Şehîd Fedakarî ya Sîda de leşkerê xo ca kerdî. Senî ke a roje dest pê operasyonê vera Zapî kenê, wina sewqîyat kerd. Têna yew şewe de dişmenî herêma Şehîd Fedakarî ke qilêk o û waro zaf teng o de 35 rey leşkerê xo nayî ro û hêrişê hewayî kerd. Xora tim hêrişê hewayî benê. Dima erdî ra verê xo da Sîda. Heme warê Zapî mîyanê operasyonî de bi. Şertanê zehmetan û binê hêrişê hewayî de 15 embazî erazî de bî û xebatê xo domnayene.
Dewleta tirke binkewtişê xo nimnena
Dişmenî vera warê Sîda û tunelanê şerî hêrişê xo zêdînayî û ma raştê yewbînan ameyî. Ma zî xora ê pawitene. Ma hazirîya xo kerdbî. Seba ke ma nê demî de zaf çalakîyî kerdî, dişmen nêeşkayêne xo bileqino. Psîkolojîya leşkeran xeripîyaye. Dişmen raştîyan hole zano la pê zûran şarî xapîneno. Vanê ‘ma hêrişê maxarayan kerd û ê çîn kerdî.’
Dişmen nêeşkeno wina rehet erdê ma îşxal bikero
Gama ke dişmen hêriş keno, kam mewzî bena wa bibo, çîyo ke destê ma ra yeno, ma kenê ke ma verê dişmenî bîgêrê. Dişmen nêeşkeno wina rehet bêro erdê ma îşxal bikero. Ma bi hewayêk qerardarî vera dişmenî şer kenê. Xora ma zanayene ke dişmen do çekanê kîmyewîyan bişuxulno. Ma goreyê nê tedbîrê xo girewtbî. Bitaybetî pê teqaber û çekanê kîmyewîyan hêriş kenê. Şewe saetêk de di bombayî eştene verê berî.
Vengdayîşê teslîmbîyayîşî qirrika înan de mend
Rojêke gama ke dişmen ver bi tunelan ame ma zî pawit ke wa bêro. Xora yew berê ma hetê teyarayan ra amebi şiktene. Leşkeran çend rojan de rayêke o ber kontrol kerdêne. Ma pê kincanê leşkerîyan xo kamûfle kerd û tîya mayîn cakerd. Gama ke leşkerî ameyî, ma da piro, leşkerêko paweberz zî tede çar leşkerî merdî. Çalakîye ra dima ma çendna rey da piro. Rojêk pê megafonan semedê teslîmbîyayîş veng da. Hela ke ma rê bîyî nêzdî ma mayin teqna. Vengdayîşê teslîmbîyayîşî qirrika înan de mend.
Rixmê teknîkê xo nêeşkenê vera gerîlayan ser bikewê
Seba ke ma zere de bifatisîyê, hela ke çekanê kîmyewîyan şuxulnenê berê tunelî qefilnenê. Ê qefilnenê, ma akenê. Ewnîyayî ke nêbeno nika beran de kameraya mobese daliqnenê. Seba ke zereyê tunelan deşîfre bikero, dişmenî kameraya ke bi dinamo xebiteyana, ard. Kamera yew çuyeyê dergî ya girêdaye û hetê tunelî rê kerd derg. Ma ûca mayîn teqna di leşkerî pîya bi kamera îmha bîyî. Gama ke ma waştêne wa dişmen bêro ma verê mobesayan de xo mojnayêne. Ma dinamo vet, best luleyê BKCyî ya kerd berî ya. Ma zî dûrî ra kontrol kerdêne. Bi nê metodî çend rey ma verê teqnayîşan girewt, ma çiwext biwaştêne dûrî ra dayênî dişmenî ro.
Dişmen mecbûr mend ke peyser agêro
Zaf rey embazan teberî ra paştî dayêne ma. Şewêke embazî tunalan ra vejîyayî û fîşekê hewayî teqnayî ke dişmenî gej bikerê. Dişmenî her hetî ser o bombayî varnayî. Hûmara maa kêmbî la ma vera 150 leşkeran çalakîye kerde. Dişmen tay çekanê taybetan ê NATOyî û çekanê kîmyewîyan şuxuleno. La ma tedbîrê xo girewtî. Ma hinî kurdê verênî nîyî. Ma destûr nêdanê ke dişmen reyna sey wextê Qirkerdişê Dêrsimî vajo ‘ma ê sey mereyan maxaran de kiştî.’ Ma warêkê tengî de û binê şertanê giranan de dişmen serûbin kerd. Pêkewtişê mesafeyê nêzdîyî qewimîyayî. Ûca 6 leşkerî merdî. Nika hema têkoşîn bi heme zordarîye dewam keno. Tunelanê şerî yê Çemço, Şehîd Botan, Şehîd Doxan û Şehîd Felatî de têkoşînê embazanê ma yê vera îşxalî dewam keno. Senî ke medayaya şerê taybetî qala serkewtişê dişmenî kena, no raşt nîyo.Dişmen mecbur mend ke cayanê îşxalkerdeyan ra xo peyser bianco.” BEHDÎNAN
