Hemserekê Pêroyî yê HDPyî Sezaî Temellîyî ard ziwan, weçînayoxê HDPyî do vera faşîzmî 23ê Hezîrane de zêdetir şorê sindoqan ser
Stenbolijî 23ê Hezîrane de seba ke weçinayîşê 31ê Adare bi derba AKPyî ya bi destê Heyetê Weçînayîşî yê Berzî (YSK) ame betalkerdene, seba weçînayîşê Şaredarîya Bajarê Girdî ya Stenbolî reyna do şorê sindoqan ser.
Partîya Demokratîke ya Şaran (HDP) zî dimayê qerarê betalkerdişê weçînayîşê 31ê Adare da zanayene ke ê do weçînayîşê 23ê Hezîrane de bi hawayêkê stratejîkî rayanê xo bidê namzedê Şaredarîya Stenbolî Ekrem Îmamoglûyî.
Temellîyî weçînayîşê 23ê Hezîrane yê Stenbolî ercna û va: “Ma peyeyê stratejîya xo yê 31ê Adare de yê. Çunke na stratejîya ma ya û ma na stratejî seba weçînayîşî nêdaye xo ver, seba prosesî bi kar arde. Weçînayîşê 23ê Hezîrane rîyê waştiş û menfaatê serdestan ra ame newekerdene. Yanî weçînitişêko viraştek o. Weçînayîşê ke ganî bêrê newekerdene yê Mûşî, Tetwan û Melezgirî yê. Stratejîya ma nêvurîyaya. Çîyo muhîm o yo ke ma çi kenê, kesê bînî çi kenê seba ma muhîm nîyo. Ma do tecrîdî bişiknê û faşîzmî birijnê. Ganî no welat nêbo esîrê destê faşîzmî. Hetê bînî ra ma têkoşînê xo rê dewam kenê. Weçînayîşî dingê muhîm ê, no tewirê ma vera faşîzmî yo. Seba şiknayîşê faşîzmê AKP-MHPyî ma do paştdayîş bidê Îmamoglûyî. 31ê Adare de ma no kerd, 23ê Hezîrane de zî ma do ney bikerê. Namzed no yo, o yo, nê vatişî babeta munaqeşeyê ma nîyê. Babeta ke ma munaqeşe kenê apeyberdişê faşîzmî yo. Çunke faşîzm xo dişmenîya Kurdan ser o awan keno. Seba ma ke ma ci ra vajê, vinde, ganî ma vera ci vinderê. Ma nê weçînayîşî de wina kenê. Rêxistinê ma yê qezayan xebatanê başan kenê. 31ê Adare de zafaneyê weçînayoxê HDPyî şîyî sindoqan ser. No do 23ê Hezîrane de zêdetir bibo. Weçînaxoyê ma yê bêqerarî zî do şorê sindoqan ser.” STENBOL
