Namzedê Hemşaredarî yê HDPyî yê Çewlîgî Hişyar Ozsoy û Hatîce Kavrane dîyar kerdî ke 30 serrî verê cû Çewlîg hîna rind bî û vatî: “AKP bedilnayîşê bajarî, bedilnayo rant û şar mexdûr kerdo. Ma do problemanê Çewlîgî bi fehmê modern çareser bikerî. Ma do seba cinîyan atolyeyê perwerde û berardişî awan bikerî.”
Namzedê Hemşaredarî yê Partîya Demokratîke ya Şaran (HDP) yê Çewlîgî Hişyar Ozsoy, Hatîce Kavran û namzedê Meclîsî yê Şaredarî rojnamegeran reyde ameyî tê het. Namzedê Hemşaredarî yê HDPyî yê Çewlîgî Hişyar Ozsoyî kombîyayîş de qisey kerd û qala projeyê xo û babetê rojeve kerd. Ozsoyî qiseykerdişê xo de bale ant krîzê ekonomî ser va: “Badê weçînayîşî huzur nêmend, demokrasî raşte ra wedarîya, xoserîya muhakeme nêmend û heme hêz destê Qesrî de yî. Cok ra bêbawerîyêka gird vejîyaya raşte.”
Ozsoyî da zanayene ke AKP MHPyî reyde welat kerdo tengî û va: “AKP serranê 90an ra zî hîna merkezperest bîyo. Çîyo ke AKP û MHPyî bidî şarê Tirkîye çin o. Fehmê şaredarîya AKPyî, kultur û vîzyonê bajar ra xeylê dûrî yo. Herinda ke butçe goreyê lazimîyê şarî bixebetnî, pêşnîyazê rantweranê xo kerdî. Her cayê Çewlîgî de awe teqaya. Demêko dergo kem a rayîrberîya herêmî ya Çewlîgî de ca gênî. Ma bawer kenî ke do xizmetêko baş şarê xo rê bikerî. AKP nêeşkeno probleman çareser bikero. Ganî problemê şar cade bêrî çareserkerdiş û butçe seba şar bêro xerckerdiş. Ma sozê çareserdişî danî. Ma do butçe seba menfîetê şarê Çewlîgî xerc bikerî û ma do hesabê kuruşan zî bidî şarê xo.”
Ma do pêroyê raşteyê cuye de cinîyan hîna aktîf bikerî
Namzeda Hemşaredarîya HDPyî ya Çewlîgî Hatîce Kavrane zî qiseykerdişê xo de bale ante problemê cinîyanê Çewlîgî ser û wina va: “Çewlîg de raşteyêko cinî tede bixebetî çin o. Ma do seba cinîyan atolyeyê perwerde û berardişî akerî. Ma do pêroyê raşteyê cuye de cinîyan hîna aktîf bikerî. Kesê ke keye rayîr benî cinîyî û keye zî parçeyêko şenik yê komelî yo. Nîmeyê komelî cinîyan ra pê yeno. Ma heme raşteyê cuye de xizmet bidî şar.”
Namzedê hamşaredarîyî badê qiseykerdişan cewab dayî persanê rojnamegeran, qala problemê bajar kerdî û derheqê çareserkerdişan de pêşnîyazan dayî. ÇEWLÎG
