Roj çina ke dewlete bi şarê kurd zext û zordarîyan nêkera. Çiqas şono zextê dewlete yê vera şarê kurd zêdîyenê. Îqtîdarê AKP û MHPyî ke şarê kurd rê tehemmulê înan qet çin o, her roje bi sebebanê cîya cîyayan hêrişê keyeyanê welatperweran kenê. Demanê peyênan de polîtîkayê ke tewr zêde hetê îqtîdarî ra yenê rayraberdene ra sereştişê keyeyan, tepiştiş, destbendkerdiş, tehdît û heqaret virazîyenê. Înan ra tewr zêde zî keyeyê ke domanê înan tewrê sefanê têkoşînê azadîye yê Kurdistanî bîyî, nesîbê xo herînenê. Nê keyeyan ra yew zî keyeyê Hatîce Tatli ya ke qezaya Hezexî ya Şirnexî de cuyena û domanê aye tewrê sefanê têkoşînê azadîye bîyî ya.
Dayika Hatîce Tatli ya 70 serrî kênayêk xo pêkewtişêk de vindî kerde, lajêk aye tewrê sefanê têkoşînê azadîye bî û lajêk aye zî nika zîndan de yo. Bado ke domanê dayika Hatîce tewrê têkoşînî benê timî raştê zextê dewlete yena. Kênaya Hatîce, Negrîn Tatli serra 2012î de tewrê têkoşînê azadîye bî. Lajê dayika Hatîce zî badê waya xo nêşono leşkerî û verê xo dano sefanê azadîye. Dayika Hatîce vatişê peynî ê lajê xo ‘Ez nêşona leşkerî’ vîr arde û vat coka ra tewrê şorişî bî. Hatîce ard ziwan ke aye roje re nata lajê xo ra tu xeberêk nêgirewta.
‘Dejê domananê mi hîna zerrîya mi de yo’
Hatîce, dîyar kerd ke seba teda û zordarîyê dewlete ra keyeyê aye ra xeylê kes tewrê PKKyî bîyo û kêna aye Negrîne zî serra 2017 de Efrîno ke wextê Tirkîya Efrîn îşxal kerd dinyaya xo bedilnaye. Hatîce, va ke qetî tedayê dewlete peynî nêbîyê û va: “Kênaya mi şehît bîye, lajêk mi ko de yo û lajêk mi zî zîndan de yo. Lajêk mi zî seba qezeya trafîkî dinyaya xo bedilnaye. Dejê domananê mi hema zerrîya mi de yo. No zî qîm nêkeno, dewlete serê ma de tedayan kena. Verê demêk gama ke ma hewn de bî, polîsan eşt serê keyeyê ma û keye vila kerdî. Qalê lajê mi ke şîyo ko kerdî û vatî, ‘Ayhan ça de yo.’ Mi zî înan ra va, ‘şima zanê lajê mi ça de yo, şima çira pers kenê?’ Û mi reaksîyon ramojna. Bi saetan keye de geyrayî. Ê zanê lajê mi ça de yo. La seba ke zulm bikerê wina kenê.”
‘Gonîya ma de îxanet çin o’
Hatîce, dîyar kerd ke ê ne dewlete rê û ne zî dewlete înan rê nêbena dost û wina va: “Dewlete hemverê ma hêrişan kena. Seba ke ma Kurd ê, hêrişê ma kena. Seba ke domanê ma tewrê PKK bîyê hêrişê ma kena. Ma ra çi wazena? Ma do qetî waştişê înan bi ca nîyatê û ma do sey înan nêbê. Ê çîyê ke wazenê do nêeşkê bi dest bikerê. Ê wazenê ke ma bikerî ajan. Domanê ma rûmetê ma yê û ma bi înan serberz ê. Ma qetî înan rê îxanet nêkenê. Tena lajê mi ney, bi hezaran kes tewrê refê azadî bîyê. Ê pêro domanê ma yê. Ma do qetî hemverê zulmî sere nêtewênê. Ma do hemverê teda û şîdetê dewlete xo ver bidê û têkoşînê xo rê wayîr vejîyê.”
‘Bi hawayêk bêhuqûqî ameyo tepiştene’
Hatîce, tewr peyîn qiseykerdişê xo de bale ant serê lajê xo yê tepişte Saît Tatli zî û qiseykerdişê xo wina qedêna: “Lajê mi hamnanî ame tepiştene û hema dewaya ci dewam kena. Bi hawayêk bêhuqûqî ameyo tepiştene. Bi mengano binê şert û mercê zehmet de zîndan de yeno tepiştene. Bi prosesê pandemîyî reyde, zîndanan de problemî xeylûk pîl bî. Lajê mi bi mengan o zîndan de yo. Teber de domanê ey pabeyê ey ê. Bi mengan o domanê ey, pîyê xo nêvînenê. Bi pandemî reyde rewşe her ke şî tewr xirab bî. Zîndanan de îhlalkerdişê heqan zêde bi û ma nêeşkenê şêrê pêvînayîşê lajê xo.” ŞIRNEX
