Endamê Heyetê Rayberdişê Merkezî yê Partîya Çep a Keske Cahît Kirkazakî derheqê netîceyanê weçînayîşî de ANFyî rê qisey kerd.
Kirkazakî ard ziwan ke îqtîdarî wextê weçînayîşan de vera kurdan dişmenîye kerda û ziwanê nefretî şuxilnayo. Kirkazakî îfade kerd ke sey Partîya Çep a Keske ê netîceyanê weçînayîşî serkewte nêvînenê û vat: ”Wexto ke Îtîfaqê Kede û Azadîye ronîya îtîfaqêkê têkoşînî ame ronayene. Yanî seba komelanê bindestan, cuya hempare ya komelkî û cuya ekolojîke yewîyêka têkoşînî ameye awankerdene. Nika zî aqlê dewlete yo tekperest û otorîter her warê cuye de hêrişê komelî keno. Vera na hêrişkerîye ganî ma têkoşînê komelkî yew bikerê.”
Kirkazakî dîyar kerd ke sey Partîya Çep a Keske nê prosesî de ê do kêmasîyanê weçînayîşî û rexneyanê şarî bivînê, goreyê ney xerîtaya xo ya rayîrî dîyar bikerê. Kirkazakî vat: ”Ma têgêrayîşêkê şarî yê. Şarê ma serkêşê ma yo. Rexneyê şarî do verê ma abikerê. Têgêrayîşê şarî, şarî reyde şino, şarî reyde xurt beno. Wa çew mevajo ‘Ma rexne kenê la vengê ma nêeşnawîyeno.’ Ma do çarçewa rayîrê şarê xo de têkoşînê xo bikerê.”
