Aktîvîstê Germîyanij reaksîyon nîşanê hêriş, dagirkerî û qetlîyamanê dewleta tirkî dayî. Aktîvîstan vatî ke Erdogan û dewleta tirkî sucê şerî kenî. Aktîvîstan vatişê dewleta tirkî û serekê Herêma Kurdistanî ke vanî ‘Dewleta tirkî vera kurdan de nê, vera PKKyî de şer kena’ red kerdî û nê persî pers kerdî: “Ma Seyîd Riza û Şêx Seîdî zî PKKyî bîyî ke dewleta tirkî înan dardekerd?”
Hêriş û qetlîyamê dewleta tirkî ya dagirkere yê vera rojawanê Kurdistanî dewam kenî. Aktîvîstê siyasî reaksîyon nîşanê eşkerayîya Erdogan û serekê Herêma Kurdistanî dayî û vatî ke hêrişê dewleta tirkî ne tena vera PKKyî, vera heme kurdan de yî. Derheqê babete de aktîvîstê Germîyanî ajansê xeberan yê Rojnewsî rê qisey kerdî.
Aktîvîstan ra Xebat Reşîdî qiseykerdişê xo de bale ant qetlîyamê dewleta tirkî ke Til Rifatî de pê ardbi ser û wina va: “No qetlîyam vera prensîbanê pêkerdişê heqê domanan de yo. Dewleta tirkî no pêkerdişî îmze kerda. Labelê dewleta tirkî pêkerdişî binpay kena. Ma çi sucê domanan esto ke merdim înan bikişo? Ez veng dana dinya ke kerdoxanê dewleta tirkî şermizar bikera. Her roje doman benî qurbanê zilm û zorîyan.”
‘Reaksîyon nîşanê vatişanê Barzanî û Erdoganî da’
Aktîvîstê bi nameyê Selah Mihemedî zî bale ant vatişê ‘Dewleta tirkî vera kurdan de nê, vera PKKyî de şer kena’ yê serekê Herêma Kurdistanî û Erdoganî ke xeylê reyan vatî ser û nê çîyan ard ziwan: “Ma Seyîd Riza û Şêx Seîdî zî PKKyî bîyî ke dewleta tirkî înan dardekerd? Şarê Dêrsimî PKKyî biyî ke raştê qirkerdişî ame? Referandumî PKK nêviraşt, labelê aye wext Erdogan qey vera referandumî de vejîya? Ziwanê kurdî yê PKKyî nîyo. Labelê Erdogan û dewleta tirkî qey destûr nêdanî ke ziwanê kurdî bibo ziwanê wendişî? Nê heme nîşan danî ke problemê zîhnîyetî yê îqtîdarê tirkî kurdan reyde esto.”
‘Ganî ma dewleta tirkî hîna zêde teşhîr bikerî’
Aktîvîstan ra tewr peynî Mihemedî qisey kerd û ê zî nê çîyan va: “Ganî ma xebatanç siyasî û komelkî merheleya dinya de hîra bikerî û sucê dewleta tirkî hîna zêde teşhîr bikerî. Lazima ke ma eşyayanê tirkî boykot bikerî û bi her hawayî xebatanê meşrû bixebetnî.”GERMIYAN
