Parlamentera rêzdar e Leyla Guven e bi çalakîya xo ya grevê veyşanî hîrê aşmî pey ra verda. Hîrê aşmîyê bê nan, bê wer û veyşan la, bi îrade, bawerî û qerarê xo mird û hêzdar e. No grevo ke bi pêşengtîya cinîya Kurde ameyo destpêkerdişî her ke şino verhîra beno. Sey ke ma zanê pêwa Guvene wa humare kesanê ke dimay aye ra kewtê nê grevî bîyê bi seyan kesî û heme zî dimayê qerarê xo yê ke heta peynî ro tecrîdî nêro ardişî ey zî peynî ro grevê xo nêanê. Înan rayîrê wedartişê tecrîdî de mergê xo dayo verê çimanê xo.
Ey zanê, wedartişê tecrîdî raste ra wedartişê bêedaletî û bêhiqûqî yo. Wedartişê tecrîdî newe ra viledayîşê hêvîya têduştî û aştîya mîyanberê şaran o. Wedartişê tecrîdî wedartişê kaos û tengasîya ke civake tede amîya mehkûmkerdişî yo. Lazim o ke heme şarê Kurdî na raştîye bivîno û ay gorî ra bêbertek û bêveng nêmano. Guvenêke bîya bi seyan Guvenî û bi seyan Guvenan barê bi milyonan merdiman giroto xo ser û bê xişûşî rayîrê xo de şinê. Etya lazim o ma yê ke teberê nê grevî de mendeyê rayêke bîne xo verê çiman ra derbas bikerê, gelo ma eşkenê hetkarîyêka senîne bidê çalakgeranê xo yê grevê veyşanî ke bê vinîkerdişê kesêke înan ra xoverdayîşê înan bi ser biko?
Ma vînenê hetêke bêvengîya rayedaranê na desthilatîya tekparêze û dewletanê serdestan û dewletê ke qaşo demokratê domêna, hetêke bêbertekîya civake, hetêke zî mudaxileyê PDK’î ke bê şerm û fedî nokerîya desthilatîya AKP’î keno û bi nê mudaxileyê xo rewşê çalakgeranê grevê veyşanî ver bi xetereyî beno. Bêtalihîyêka çiqas şermdarî ya ke na partîya ke îxanetê ro şarê xo sey wezîfeyêke pîroz giroto xo ser şeşê sibatî de şaristanê Hewlêrî de hemverê kone çalakgeranê grevê veyşanî êrîş pêk ard û hewl da ke bi ey mudaxilyê xo zerre dişminê şarê Kurdî şa bikero. No mudaxileyê ey raştîya PDK’î rayêke bîne bi awayêke zelal moşt ma. Her ke şarê Kurdî biko tengasî yan zî hemverê dagirkeranê welatê xo rayîrêke têkoşîne bido vernîya xo PDK cêke ra zince xo veceno û heta ey ra yeno tengasîyêke bîne ro tengasîyanê şarê Kurdî zêdneno û bi hetkarîya xo ya dagirkeran rê hewl dano têkoşîne şarê Kurdî bişikno.
Senîn ke na desthilatî wazena hem her çar perçeyan de hem zî her cayê dinya de Kurdan bênefes verdo, PDK/Berzanî zî kam perçeyî de serkewtişê Kurdan bivîno hewl dano ey serkewtişê înan têk bero û bi nokerîya xo zerre dagirkeran weş bikero. Eyro têkoşîn û xoverdayîşo ke şexsê Leyla Guvene de şarê ma semedê wedartişê tecrîdî pêk ano lazim o semedê wedartişê îxanet nokerîya ke ro şarê Kurdî yena kerdişî zî têkoşînêke bêro dayîşî ke etya ra tepya ti şexs, ti sazî û partî cesaret nêkero hemverê şarê Kurdî kişta dagirkeran de ca bigîro û derbeyê newînan ro şarê Kurdî û têkoşîna azadî ya şarê Kurdî bido. Lazim o şarê Kurdî yewîtîya xo awan bikero û qanûnêke hemverê nokerî û îxanetî virazo ke etya ra tepya noker û xayînî wina rehet rehet nêeşkê elehîya şarê Kurdî de kişte dagîrkeran de ca bigîrê. Lazim o ma têkoşîne xo xurt bikerê û tecrîdîdir nê îxanet û nokerî zî raste ra wedarê. Heta tecrîd bidomyo go kaos û tengasî zî wina bidomyê, heta îxanet û nokerî bidmoyo go bindestî û zilmê dagirkeran zî bidomyo.
