Yek ji Fermandarê Biryargeha Navenda Parastina Gel Amed Malazgîrt ji ser cîhazê bangî hêzên gerîla kir ên ku ji 17’ê Nîsanê vir ve li Avaşîn û Zapê li hemberî êrişên dagirker ên dewleta tirk li ber xwe didin. Malazgîrt derbarê berxwedana gerîlayên HPG û YJA Starê agahiyên balkêş da.
Malazgîrt bi bîr xist ji 14’ê Nîsanê heta 17’ê Nîsanê bi 55 balefirên şer û bi dehan wesayîtên çekdar ên bêmirov ji hewayî ve qad hatine bomberdûmankirin û derbarê rewşa dawîn a şer ev agahî da: “Niha hûn jî dizanin ku dijmin dixwaze herêma başûrê Kurdistanê bi taybetî jî Herêmên Parastinê yên Medyayê bi giştî dagir bike. Vê operasyona ku niha dest pê kiriye, 14’ê Nîsanê heta bi 17’ê Nîsanê bi êrişeke hewayî ya dijwar bi 55 balafirên şer û bi dehan dronên çekdar êrişeke pir mezin dest pê kir.
Ji herêma Werxelê bigire, ji Şehîd Şahîn û Cîloya Biçûk, Şikefta Birîndara û herêma Çiyareş bigire, Kurojahro, heta bi Çemço û Sîda; dema êrişeke hewayî ya dijwar dest pê kir, roja 17’ê Nîsanê bi helîkopterên Skorsky bi alîkariya balafirên şer, helîkopterên êriş ên Kobra û Atakan xwestin li ew cihên ku me navên wan dan li hemû cihên stratejîk leşkerên xwe deynin. Lê hevalan bi fedakariyeke mezin û bi ruhê PKK’yiyeke tam bersivên dijwar dan. Werxelê berxwedaniyeke mezin kir, niha şer li wê derê dijware. Li qada Şehîd Şahîn bi şev û roj hem li dijî leşkeran û hem jî ji bo ku nekaribin leşker deynin, çi ji destê hevalan hat kirin. Dîsa di heman astê de herêma Çemço, hem di parastina Werxelê û hem jî di parastina Şehîd Şahîn de xwedî roleke mezin bû, bersivên dijwar dan û bû sedem ku dijmin ya dixwest nikaribe cihê ku dixwest leşkeran deyne. Her wiha di heman astê de li Şikefta Brîndara û Karker jî heval bi fedakariyeke pir mezin li hemberî teknîka her dijwar bi şev û roj têkoşîn kirin û nehiştin dijmin li ser lûtkeyên Şikefta Brîndara û Karker leşkeran deyne û heta niha jî hevalan bi çalakiyên bi bandor derbên pir xurt li dijmin dixin.
Gerîla taktîkên xweser û nû bi kar tîne
Dîsa di heman astê de li Kurojahro de bi çalakiyê pir bi bandor, bi taybetî bi çalakiyên xweser û bi taktîkên nû ango li cihê ku pêwîst bike bi çalakiyên sabotajê, cihê ku pêwîst bike bi taktîka vedizînê (xwe berdidin nava dijmin), cihê ku pêwîst bike derbkirin û cihê pêwîst bike jî çûyîna ser dijmin; bi wan çalakiyên bi bandor jî bi taybetî li herêma Kurojahro milê Şehîd Şemdîn û xeta Şehîd Harûn çalakiyên bi bandor hatin kirin. Di heman astê de dîsa li lûtkeya Kurojahro hevalan di bin bombebaraneke pir mezin de û heta niha berxwedaniyeke mezin dikin.
7 cenazeyên dijmin ketin destê gerîla
Her wiha hevalan li herêma Çiyareş û Cehenem, tevî ku dijmin hemû derfetên xwe xwest li herêma Cehenem leşkeran deyne, lê hevalan nehiştin û heta niha jî tekoşînê dikin. Li herêma Çiyareş bi komên biçûk û bi çalakiyên bi bandor şev û roj li hemberî dijmin çalakiyan dikin. Çalakiyên wana jî serkeftî ne. Bi taybetî jî bi ew çalakiya li ser Girê Rûbar derbeyên xurt li dijmin xistin û çûn ser herî kêm 7 cenazeyên dijmin. Her wiha ew çalakiyên ku me qala wan kirî, di nava wan de bi taybetî hêzên me yekeyên çekên giran bikar tînin, pir alîkarî dan. Hem li milê Şikefta Birîndara, hem jî li ser Kevirêkun çalakiyên lidar xistinî serkeftî bûn.
Em hevalên li ser çekên giran pîroz dikin
Dîsa li ser lûtkeya Kurojahro çalakiyên xwe bi bandor bûn, em hevalên di yekeyên çekên giran de cîh girtine û wan çalakiyane li dar xistine, em wana silav dikin û serkeftinê dixwazin. Yanî dema em bi giştî li herêmê temaşe dikin, bi rastî jî lêhûrbûn û fedakariya hevalan, sozên ku di pêvajoya zivistanê danî îro bi kirdeyî û bi layîqî pêk tînin. Ji bo wê jî hevalên ku di wan berxwedanan de cîhê xwe digirin, fedakarî dikin û ked didin, em hemû hevalan silav dikin û serketinên mezintir dixwazin û em eniya wan hemû hevalên ku ew derbeyên li dijmin xistinî maç dikin û serketinê ji wan re dixwazin.”
