Malbat û parêzerên Rêberê Gelê Kurd Abdullah Ocalan û girtiyên din Omer Hayrî Konar, Hamîlî Yildirim û Veysî Aktaş ji bo hevdîtina li Girtîgeha Tîpa F a Bi Ewlehiya Bilind a Îmraliyê, serî li Serdozgeriya Komarê ya Bursayê dan. Parêzer Faîk Ozgur Erol, Cengîz Yureklî, Mazlum Dînç û Newroz Uysal ji bo ku di 30’ê nîsanê û di 7’ê gulanê de li Îmraliyê bi muwekîlên xwe re hevdîtinê bikin, serî li serdozgeriyê dan.
Hêjayî gotinê ye ku Ocalan piştî 21 salan, yekem car di 27’ê nîsanê de li ser telefonê bi birayê xwe Mehmet Ocalan re axivî. Girtiyên din Konar, Yildirim û Aktaş jî ji sala 2015’an heta niha cara yekemîn di heman rojê de bi malbatên xwe re li ser telefonê axivî bûn.
Ocalan di hevdîtinê de geşedanên li başûrê Kurdistanê û Rojava nirxandibû û banga yekitiyê li hêzên kurd kiribû. Ocalan protokola sala 1982’yan ku di navbera wî û Îdrîs Barzanî de hatibû îmzekirin bi bîr xist û banga hevgirtin û pêşxistina yekitî û aştiyê li PKK, PDK û YNK’ê kir. STENBOL
