Emîne Şenyaşar a di encama êrîşa parêzvan û xizmên parlamenterê AKP’ê yê Rihayê Îbrahîm Halîl Yildiz de hevjînê xwe û du kurên xwe winda kir, li gel kurê xwe Ferît Şenyaşar li pêş Edliyeya Rihayê bi daxwaza ‘Edaletê’ di çalakiya nobetê de ne. Nobeta malbata Şenyaşar di roja 36’emîn de berdewam dike. Di saetên serê sibê de Malbata Şenyaşar hat li pêş edliyeyê û li ber bariyerên li pêş avahiyê dest bi lêgerîna xwe ya edaletê kirin.
Ferît Şenyaşar axivî û bi bîr xist ew bi êrîşan re rûbirû dimînin û wiha got: “Heke darizandineke adil hebûya wê birayê min hatibûya berdan. Cezayekî giran dan birayê min û di odeyeke yekkesî de tê girtin. Em nikarin biçin malê. Em ê di meha Remezanê de li vir bin. Em ê li vir fitara xwe vekin. Em naçin. Heta ku ew 23 kesên dozger qala wan kir neyên girtin em ji vir ranabin.”
Şenyaşar diyar kir ku xizmên Yildiz ê AKP’î ku li nexweşxaneyê êrîşî wan kirin di Şaredariya Pirsûsê û saziyên din ên fermî de dixebitin û wiha axivî: “Kesên ku me teşhîs kirine niha li saziyên cemaweriyê de dixebitin. Birayê min kes nekuşt. Raporên pispor jî vê aşkera dike.”
Şenyaşar carek din banga piştevaniyê kir. RIHA
