Malbatên girtiyan ji bo ku balê bikişînin ser rewşa girtiyên nexweş û ji ber ku înfaza wan tê şewitandin nayên berdan, li Baroya Amedê ji 16’ê Mijdarê û vir ve di Nobeda Edaletê de ne.
MED-DER, Şaxa OHD’ê ya Amedê, Nûnerê TÎHV’ê Mûrat Aba û nivîskar Hemîd Dilbihar çûn serdana malbatan.
Hevserokê MED-DER’ê Rifat Ronî di serdanê de diyar kir ku îro li 355 girtîgehan 300 hezar kes girtî ne û wiha got: “Ji van kesan hezar û 604 jî girtiyên nexweş in. Divê girtiyên nexweş werin berdan. Daxwazên malbatan mirovî ne, ji ber vê ez bawer im ev daxwaz wê wijdanê civakê jî têxe nav hewldanan. Em diyar dikin daxwazên malbatan û yên girtiyan daxwazên me ne jî.”
Nivîskar Hemîd Dilbahar jî bang li nivîskar, wêjekaran û hemû saziyan kir ku piştgiriyê bidin malbatan û got ku berxwedana malbatan berxwedana wan e.
Nûnerê TÎHV’ê Mûrat Aba jî diyar kir girtî nikarin biçin nexweşxaneyê û ev tişt anî ziman: “Li gorî protokolê heke nexweş bin jî dema tên tedawîkirin divê serbest bin û li hundir polîs û jendirme tunebe. Lê em dibînin dema ku girtiyên nexweş tên tedawîkirin, kelepçeyên di destê wan de jî nayên derxistin. Ev îşkence ye.” AMED
