Malbatên şehîdan ên kantona Girê Spî nerazîbûna xwe ji mudaxeleya Tirkiyeyê di kar û barên herêmên Bakur û Rojhilatê Sûriyê de rave kir û tekez kir ku ew ê mîna zarokên xwe li ber xwe bidin, vê axê biparêzin û azadiyê ji gelê re pêk bînin
Malbatên şehîdan nêrînên xwe der barê tevgera artêşa tirk a dagirker a li ser sînor û gefên wê yên li ser herêmên Bakur û Rojhilatê Sûriyê ji ajansa ANHA’yê re anîn ziman.
Şêniyên kantona Girê Spî li ser bi cih bûna leşkerên tirk ên li ser sînor û gefên li herêmên Bakur û Rojhilatê Sûriyê axivîn û nerazîbûn nîşan dan. Şêniya bi navê Necah Xelîl dibêje ew nahêlin dewleta tirk a dagirker derbasî axa wan bin a ku bi xwîna şehîdan hatiye avdan. Necah tekez kir ku ew ê li hember dewleta tirk a dagirker li ber xwe bidin û nahêlin Tirkiye derbasî herêmê bibe.
Şêniyê bi navê Îsa Mistefa El-Eqle wiha got: “Piştî serkeftinên HSD`ê li herêmên Bakur û Rojhilatê Sûriyeyê û destkeftiyên Rêveberiya Xweseriya Demokratîk ên ku bi saya xwîna şehîdan hatine pêkanîn û hevgirtina gelê herêmê, Tirkiye hewl dide ewlehiya herêmê têk bibe û bi hinceta parastina herêmê hêzên xwe li ser sînorên Girê Spî kom dike. Çawa me şerê DAIŞ`ê kir û tune kir, em ê şerê her êrîşkarekî ku hewl dide êrîşî axa me bike, bikin.”
Girêdayî heman mijarê şêniya bi navê Şemse Qadir dayika şehîd Hemze Kobanê jî nerazîbûn nîşan da û ev tişt anî ziman: “Bi salan me gelek ji Tirkiyê tehemul kir. Êdî bes e. Ji vê zêdetir em ji ber mafê xwe bê deng namînin.” GIRÊ SPÎ
