Dewleta tirk 2 sal berê cenazeyê 267 gerîlayên PKK’ê ji goristana Xerzanê ya Bedlîsê derxistibûn û biribûn Stenbolê. Heta niha tenê 2 malbatan cenazeyên zarokên xwe girtin e. 10 malbatan ji bo cenazeyan werbigirin serlêdan kirin. ÎHD’a Tetwanê jî ji bo girtina cenazeyan bang kir
Di 19’ê kanûna 2017’an leşkerên dewleta tirk 267 cenazeyên gerîlayên PKK’ê yên li Goristana Xerzanê ya li gundê Oleka Jor a Bedlîsê derxistibûn û biribûn Saziya Tiba Edlî ya Stenbolê (ATK.) Cenaze li ATK’ê hêj tên rawestandin. Heta niha tenê du malbatan cenazeyên xwe wergirtin. Tevî ku 475 roj derbas bûn jî malbatên din cenazeyên xwe wernegirtine. Bêyî ku tu hincet nîşanî 38 malbatên serlêdan kiribûn nadin wan.
Hîlmî Altin, Ahmet Çelîk, Mahmut Toprak, Nezîr Ozcan, Şayiste Karabaş, Musaava Okta, Hediye Karabay, Fazîle Karabay, Şadiye Bîngol û Ziyadîn Bîngol ên ji Stenbol û Edeneyê ji bo wergirtina cenazeyan hatin Bedlîsê, piştî serlêdana dozgeriyê ji ba testa DNA’yê xwîn dan nexweşxaneya dewletê. Bi serlêdana 10 malbatên din re jî hejmara malbatên serlêdan kirine gihîşt 48 malbatan. 219 malbat hêj serlêdan nekiriye.
Parêzerên endamên ÎHD’a Tetwanê banga li malbatan kir û xwestin malbatên serlêdan nekirine divê demek berî demekê biçin serlêdanê bikin. BEDLÎS
