Hetgirê Mudirê Perwerdeyî yê Neteweyî yê Amedî H.O 20ê sibate de mamostaya muzîkî Pelda Sevîma ke qezaya Bismilî ya Amedî de Lîseya Anadoluye ya 15ê Temmuze de xebetîyena, dawetê Mudirîya Perwerdeyî ya Bajarî kerd. 3 polîsî odeya H.O.yî de mamosta Pelda Sevîme girewtî îfade û aye rê ajanîye kerz kerdbî. Sevîme vizêr derheqê rewşa xo de Şubeyê Amedî yê Komele Heqê Merdiman (ÎHD) de kombîyayîşê çapemenîye viraşte. Sevîme ewro zî derheqê babete de muracatê Serdozgerîya Komarî ya Amedî kerde.
Sevîme bi rayîrê avûkatanê xo derheqê Hetgirê Mudirê Perwerdeyî yê Neteweyî yê Amedî H.O.yî de muracatê sucî kerde û waşte ke kesê ke xo sey polîsan dayî şinasnayîş û aye rê ajanîye ferz kerdî bêrî tespîtkerdene û derheqê înan de tehqîqat bidîyo dest pêkerdene. Keyeyê Sevîme zî waşt ke çîyo ke ameyo sereyê kênaya înan bêro roşnkerdene û da zanayene ke heta ke nê kesî nêvejîyî verê muhakeme do hedîse taqîp bikerî.
Heto bîn de ame îdîakerdene ke Mudirê Perwerdeyî yê Neteweyî yê Amedî zî derheqê babete de tehqîqat dayo dest pêkerdene. AMED
